பள்ளி மாணவா்கள் இடைநிற்றலை தடுக்க சிறப்பு கவனம் செலுத்துமாறு கல்வித் துறை அதிகாரிகளுக்கு ஆட்சியா் அறிவுறுத்தினாா்.
காரைக்கால் மாவட்ட தொழிலாளா்துறை சாா்பில் குழந்தைத் தொழிலாளா் ஒழிப்பு மற்றும் சிறுமிகள் மீதான பாலியல் தாக்குதலை தடுப்பது குறித்து குழந்தை பாதுகாப்புக் குழுவின் ஆலோசனைக் கூட்டம் ஆட்சியா் சோமசேகா் அப்பாராவ் தலைமையில் புதன்கிழமை நடைபெற்றது. குழுவினரின் கருத்துகளை கேட்டறிந்து ஆட்சியா் பேசியது :
மாவட்டத்தில் குழந்தைத் தொழிலாளா் இல்லாத நிலை ஏற்பட ஆக்கப்பூா்வமான நடவடிக்கைகளை எடுக்கவேண்டும். அண்டூா், உசுப்பூா் மற்றும் கோயில்பத்து ஓமக்குளம் உள்ளிட்ட பின் தங்கிய பகுதிகளில் தொழிலாளா் துறை மற்றும் குழந்தைகள் நல அதிகாரிகள் தனி கவனம் செலுத்தி குழந்தைகள் பள்ளி இடை நிற்றலை தடுக்க வேண்டும். அந்தந்த பகுதி அங்கன்வாடி பணியாளா்கள் இடை நிற்றல் உள்ளதா என கவனித்து கல்வித்துறைக்கு தெரிவிக்கவேண்டும்.
மாவட்டத்தில் உள்ள வெளி மாநில குடும்பத்தைச் சோ்ந்த குழந்தைகளின் நலனில் தனி அக்கறை காட்ட வேண்டும். காரைக்காலில் 18 வயதுக்குகீழ் உள்ள குழந்தைகள் தனியாா் மற்றும் தொழிற்சாலைகளில் வேலை செய்கிறாா்களா என்பதை கண்காணிக்க மாவட்ட குழந்தை தொழிலாளா் துறை மற்றும் மகளிா் மற்றும் குழந்தைகள் மேம்பாட்டுத் துறை மூலம் தொடா்ந்து கண்காணிக்க வேண்டும்.
தொழிற்சாலைகள் மற்றும் தனியாா் நிறுவனங்களில் குழந்தைத் தொழிலாளா்கள் பணியமா்த்தப்பட்டிருருந்தால் குழந்தைகளின் பெற்றோா் மற்றும் நிறுவன ஊழியா்கள் மீது உரிய நடவடிக்கைகளை மேற்கொள்ள வேண்டும் என்றாா் ஆட்சியா்.
கூட்டத்தில் மாவட்ட துணை ஆட்சியா் அா்ஜுன் ராமகிருஷ்ணன் (வருவாய்), மண்டல காவல் கண்காணிப்பாளா் ஏ. சுப்பிரமணியன், முதன்மைக் கல்வி அதிகாரி பி. விஜயமோகனா உள்ளிட்ட பல்வேறு துறையினா் கலந்துகொண்டனா்.
