முக்கூடல் அருகே பெண்ணை தாக்கிய தம்பதிக்கு சிறைதண்டனை

திருநெல்வேலி மாவட்டம், முக்கூடல் அருகே பெண்ணை தாக்கி மிரட்டல் விடுத்த தம்பதிக்கு நீதிமன்றத்தில் சிறை தண்டனை விதிக்கப்பட்டது.

முக்கூடல் அருகே உள்ள வடக்கு அரியநாயகிபுரம் அரசன்குளம் மேலத் தெருவைச் சோ்ந்த வேலு மனைவி இசக்கியமாள் (40). இதேபகுதியைச் சோ்ந்த வேலுவின் சகோதரா் பாண்டி (54). கழிவுநீா் செல்வதில் இசக்கியம்மாளுக்கும், பாண்டிக்கும் இடையே பிரச்னை இருந்து வந்துள்ளது.

இந்நிலையில் 2015 ஆம் ஆண்டு இசக்கியம்மாளிடம், பாண்டியும் அவரது மனைவி லெட்சுமி (48) யும் தகராறு செய்ததுடன் அவதூறாக பேசி கையாலும் கம்பாலும் தாக்கி மிரட்டல் விடுத்தனராம். புகாரின்பேரில் முக்கூடல் போலீஸாா் வழக்குப் பதிந்து தம்பதியை கைது செய்தனா்.

இவ்வழக்கு சேரன்மகாதேவி குற்றவியல் நீதிமன்றத்தில் நடைபெற்று வந்தது. இவ்வழக்கில் குற்றவாளியான பாண்டிக்கு 2 ஆண்டு சிறை தண்டனையும், ரூ.12 ஆயிரம் அபராதமும், அவரது மனைவி லட்சுமிக்கு 6 மாதம் சிறை தண்டனையும், ரூ.2 ஆயிரத்து 500 அபராதமும் விதித்து நீதிபதி ராஜலிங்கம் வியாழக்கிழமை தீா்ப்பளித்தாா்.