முதலீட்டுக்கு அதிக லாபம் தருவதாக முதியவரிடம் ரூ.1 கோடி மோசடி: ஒருவா் கைது

பங்குச் சந்தை முதலீட்டுக்கு அதிக லாபம் தருவதாக முதியவரிடம் ரூ.1 கோடியே 65 ஆயிரம் மோசடி செய்தது தொடா்பாக சைபா் கிரைம் போலீஸாா் ஒருவரைக் கைது செய்துள்ளனா்.

கோவை, பீளமேடு தண்ணீா்பந்தல் பகுதியைச் சோ்ந்தவா் யுவராஜ் (71), தனியாா் நிறுவனத்தில் பணியாற்றி ஓய்வுபெற்றவா். இவா், பங்குச் சந்தையில் முதலீடு செய்வது தொடா்பாக இணையத்தில் அண்மையில் தேடியுள்ளாா்.

அப்போது, இவரது வாட்ஸ்ஆப் எண்ணுக்கு ஒரு குறுஞ்செய்தி வந்துள்ளது. அதில், பங்குச் சந்தையில் முதலீடு செய்து அதிக லாபம் ஈட்டுவது தொடா்பான உத்திகள் கற்றுத்தரப்படும் என்றும், தாங்கள் கூறும் நிறுவனத்தில் முதலீடு செய்தால் தினசரி 10 முதல் 20 சதவீதம் வரை லாபம் கிடைக்கும் என்றும் குறிப்பிடப்பட்டிருந்தது.

தொடா்ந்து, யுவராஜைத் தொடா்புகொண்டு பேசிய நபா், பங்குச் சந்தையில் எளிதாக அதிக லாபம் பெறலாம் எனக்கூறி, அவா் கூறிய நிறுவனத்தின் வாட்ஸ்ஆப் குழுவிலும் யுவராஜை இணைத்துள்ளாா்.

இதையடுத்து, தனது வங்கிக் கணக்கில் இருந்து பல தவணைகளில் ரூ.1 கோடியே 65 ஆயிரத்தை யுவராஜ் முதலீடு செய்தாா். ஆனால், அந்த நபா் கூறியதுபோல லாபம் ஏதும் கிடைக்கவில்லை.

இந்நிலையில், முதலீட்டுப் பணத்தைத் திரும்பப்பெற முயன்றபோது அதனையும் பெற முடியவில்லை. மேலும், யுவராஜிடம் பேசிய நபரையும், அவா் கூறிய நிறுவனத்தையும் தொடா்புகொள்ள முடியவில்லை.

அதன்பின், தான் ஏமாற்றப்பட்டதை அறிந்த யுவராஜ், கோவை மாவட்ட சைபா் கிரைமில் அண்மையில் புகாா் அளித்தாா். அதன்பேரில், போலீஸாா் வழக்குப் பதிவு செய்து விசாரணை நடத்தி வந்தனா்.

விசாரணையில், முதியவரிடம் மோசடியில் ஈடுபட்டவா் கிருஷ்ணகிரி மாவட்டம், ஒசூரைச் சோ்ந்த மாதப்பன் (39) என்பது தெரியவந்தது. இதையடுத்து, அவரை போலீஸாா் சனிக்கிழமை கைது செய்தனா்.