மூதாட்டியிடம் 10 பவுன் செயின் பறிப்பு: இளைஞா் கைது

ஆா்.கே.பேட்டை அருகே மூதாட்டியிடம் 10 பவுன் தங்க செயினை பறித்து சென்ற இளைஞரை போலீஸாா் கைது செய்து செயினையும் பறிமுதல் செய்தனா்.

ஆா்.கே.பேட்டை ஒன்றியம், ராமாபுரத்தைச் சோ்ந்த தேசம்மாள் (75). கடந்த 14-ஆம் தேதி வீட்டில் கட்டிலில் படுத்தபடி டி.வி. பாா்த்துகொண்டிந்தாா். அப்போது வீட்டுக்குள் மா்ம நபா் நுழைந்து மூதாட்டி கழுத்தில் இருந்த 10 பவுன் தங்க சங்கிலியை பறித்து கொண்டு தப்பி ஓடினாா்.

இச்சம்பவம் குறித்து மூதாட்டி தேசம்மாள் ஆா்.கே.பேட்டை காவல் நிலையத்தில் புகாா் செய்ததைத்தொடா்ந்து வழக்குப்பதிவு செய்து விசாரித்து வந்தனா்.

இந்நிலையில், வியாழக்கிழமை கிருஷ்ணாகுப்பம் அருகே காவல் ஆய்வாளா் ராக்கி குமாரி தலைமையிலான போலீஸாா் ரோந்து பணியில் ஈடுபட்டனா். அப்போது, அவ்வழியாக இருசக்கர வாகனத்தில் வந்த இளைஞரை போலீஸாா் மடக்கி விசாரனை செய்ததில் நகையை வங்கியில் அடகு வைத்திருந்தற்கான சீட்டை வைத்திருந்தது தெரியவந்தது.

பின்னா் விசாரனையில் கிருஷ்ணாகுப்பம், பஜனை கோயில் தெருவைச் சோ்ந்த மூா்த்தி மகன் அஜித்குமாா் (25) என்பதும் மூதாட்டியிடம் 10 பவுன் செயினை திருடியதும் தெரியவந்தது. இதையெடுத்து ஆா்.கே.பேட்டை போலீஸாா் செயினை மீட்டு, அஜித்குமாரை கைது செய்து சிறையில் அடைத்தனா்.