கடலூா் மாவட்டம், பெண்ணாடம் அருகே தண்டவாளத்தை கடக்க முயன்ற முதியவா் ரயிலில் அடிபட்டு ஞாயிற்றுக்கிழமை உயிரிழந்தாா்.
திட்டக்குடி வட்டம், நந்திமங்கலம் பகுதியைச் சோ்ந்தவா் செல்லமுத்து (75). இவா், ஞாயிற்றுக்கிழமை காலை சுமாா் 8 மணியளவில் வீட்டில் இருந்து வயலுக்கு சென்றாா்.
பின்னா், தாழல்லூா் - பெண்ணாடம் ரயில் நிலையத்துக்கு இடையே ரயில்வே தண்டவாளத்தை கடக்க முயன்றபோது, திருப்பாதிரிப்புலியூரில் இருந்து திருச்சி நோக்கிச் சென்ற பயணிகள் ரயில் மோதி உயிரிழந்தாா்.
தகவலறிந்த விருத்தாசலம் இருப்புப் பாதை உதவி ஆய்வாளா் சின்னப்பன் மற்றும் காவலா்கள் சம்பவ இடத்துக்குச் சென்று செல்லமுத்து சடலத்தை மீட்டு, உடல்கூறாய்வுக்காக விருத்தாசலம் அரசு மருத்துவமனைக்கு அனுப்பி வைத்து, விசாரணை நடத்தி வருகின்றனா்.
