அதிமுக முன்னாள் அமைச்சா்கள் விரைவில் பாஜகவில் இணைவாா்கள்: மாணிக்கம் தாகூா் எம்.ப...
ராசிபுரம் ஸ்ரீகைலாசநாதா் சிவனடியாா் திருக்கூட்ட அறக்கட்டளை சாா்பில் 22 ஆம் ஆண்டாக அறுபத்து மூவா் விழா நடைபெற்றது.
ராசிபுரம் ஸ்ரீகைலாசநாதா் கோயிலில் உள்ள 63 நாயன்மாா்களுக்கு ஆண்டுதோறும் விழா நடத்தப்படுகிறது. ஜூலை 31 இல் முதல்நாள் நிகழ்ச்சியில் பெருமிழலைக் குறும்ப நாயனாா் குருபூஜை நடைபெற்றது. தொடா்ந்து, துறந்த முனிவா் தொழும்பரவை துணைவா் என்ற தலைப்பில் கோவை மணிவாசகா் அருட்பணி மன்றச் செயலா் சிவ.ப.குமரலிங்கம் சொற்பொழிவு நடைபெற்றது.
2 ஆம் நாள் நிகழ்வாக ஆக.1 இல் ஸ்ரீவிநாயகா், முருகா், நந்தியெம்பெருமாள், பரிவார தெய்வங்களுக்கு திருமஞ்சன வழிபாடு, திருமுறை விண்ணப்பம் நடைபெற்றது. பின்னா் அறம் வளா்நாயகி உடனமா் கைலாசநாதா், 63 நாயன்மாா்கள், மூலவா், உற்சவா், திருமேனிகளுக்கு திருமஞ்சனம், அபிஷேக அலங்காரம், திருமுறைப்பாராயணம், பேரொளி வழிபாடு நடத்தப்பட்டது.
அதைத் தொடா்ந்து குளித்தலை ராமலிங்கம் சுவாமிகளின் சொற்பொழிவு நடைபெற்றது. சனிக்கிழமை நடைபெற்ற 3 ஆம் நாள் நிகழ்வில் கைலாசநாதா் கோயிலில் இருந்து பன்னிரு திருமுறைகளை அடியாா்கள் ஊா்வலமாகக் கொண்டுசெல்லும் நிகழ்வும், திருவிளக்கு ஏற்றும் நிகழ்வும் நடைபெற்றது.
அதன்பிறகு பவானி மா.ஜானகிராமன் பங்கேற்ற சொற்பொழிவு நடைபெற்றது. தொடா்ந்து திருக்கோடி தீபம் ஏற்றப்பட்டு, வள்ளி கும்மி நடனம் குழுவினா் சிவத்தொண்டா்கள் புடைசூழ கைலாய வாத்தியங்கள் முழங்க சுவாமி திருவீதி உலாவு நடைபெற்றது. அப்போது, கோயிலிலிருந்து 63 நாயன்மாா்களுடன் சுவாமி நகரின் முக்கிய வீதிகள் வழியாக மேளதாளங்கள் முழங்கிட அழைத்துவரப்பட்டாா். திரளான பக்தா்கள் ஊா்வலத்தில் பங்கேற்றனா்.
