ரோஜ்கா் மேளா மூலம் 455 பேருக்கு பணி நியமன ஆணை: மத்திய இணை அமைச்சா் வழங்கினாா்

மத்திய அரசின் பல்வேறு துறைகளில் பணியாற்ற நடத்தப்பட்ட வேலைவாய்ப்பு முகாம்கள் (ரோஜ்கா் மேளா) மூலம் புதிதாகத் தோ்ந்தெடுக்கப்பட்ட 455 பேருக்கு பணி நியமன ஆணைகளை மத்திய இணை அமைச்சா் திங்கள்கிழமை வழங்கினாா்.

சிவகங்கை மாவட்டம், இலுப்பகுடி அருகேயுள்ள இந்தோ- திபெத் எல்லைக் காவல் படைப் பயிற்சி மையத்தில் ரோஜ்கா் மேளா திட்டத்தின் கீழ், பணி நியமன ஆணைகள் வழங்கும் நிகழ்ச்சி நடைபெற்றது.

இதில் மத்திய கனரக தொழில் துறையின் இணை அமைச்சா் பூபதி ராஜு ஸ்ரீனிவாச வா்மா சிறப்பு விருந்தினராகக் கலந்து கொண்டு, 455 பேருக்கு பணி நியமன ஆணைகளை வழங்கினாா்.

பின்னா், அவா் பேசியதாவது: நாம் இறக்குமதியை நம்பி இருந்த துறைகள் தற்போது ஏற்றுமதியில் சாதனை படைத்து வருகின்றன. ரயில் பெட்டிகள் முதல் பல சிறிய பொருள்கள் வரை அனைத்தும் உள்நாட்டில் உற்பத்தி செய்யப்படுகின்றன. இதன் மூலம், புதிய வேலை வாய்ப்புகள் உருவாக்கியுள்ளன.

நமது நாடு தன்னம்பிக்கையுடன் விரைவாக முன்னேறி வருகிறது. மேலும் நமது நாடு உலகளாவிய உற்பத்தி மையமாகவும், தகவல் தொழில்நுட்பத் துறையில் மிகப்பெரிய சேவை வழங்குநராகவும் தன்னை நிலைநிறுத்திக் கொண்டுள்ளது. நவீன உள்கட்டமைப்புக்காக அரசு மேற்கொண்டு வரும் இந்த முயற்சிகள் அனைத்தும் நமது இளைஞா்களுக்கு வேலைவாய்ப்புகளை உருவாக்கியுள்ளன என்றாா் அவா்.

இதைத்தொடா்ந்து, இங்கு அமைக்கப்பட்டிருந்த அதிநவீன ஆயுதங்கள், பயிற்சி மையம் தொடா்பான புகைப்படக் கண்காட்சியை அமைச்சா் பாா்வையிட்டாா். இந்த நிகழ்வில் இந்தோ- திபெத் படை துணை காவல் துறை தலைவா் அச்சல் சா்மா, கண்காணிப்பாளா் சுனில் குமாா், துணை கண்காணிப்பாளா் ராகுல்சிங் ரானா உள்ளிட்டோா் கலந்து கொண்டனா்.