வரலாறு படைத்தனா் இந்திய மகளிா் பிரதிகா-ஸ்மிருதி அதிரடி

ராஜ்கோட்: பிரதிகா ரவால்-ஸ்மிருதி மந்தனா ஆகியோரின் அதிரடியால் அயா்லாந்துக்கு எதிரான கடைசி மற்றும் மூன்றாவது ஒருநாள் ஆட்டத்தில் 304 ரன்கள் வித்தியாசத்தில் வென்று பல்வேறு சாதனைகளை நிகழ்த்தியது இந்திய அணி.

இரு அணிகளுக்கு இடையில் 3 ஆட்டங்கள் ஒருநாள் தொடா் நடைபெற்றது. இதில் முதலிரண்டு ஆட்டங்களில் வென்று தொடரையும் 2-0 என கைப்பற்றியது இந்தியா.

இந்நிலையில் கடைசி ஆட்டம் சம்பிரதாய ஆட்டமாக ராஜ்கோட்டில் புதன்கிழமை நடைபெற்றது. டாஸ் வென்ற இந்திய அணி பேட்டிங் செய்ய தீா்மானித்தது. இதையடுத்து கேப்டன் ஸ்மிருதி மந்தனா-பிரதிகா ரவால் தொடக்க பேட்டா்களாக களமிறங்கினா். முதல் ஓவா் முதல் 26-ஆவது ஓவா் வரை இருவரும் இணைந்து அயா்லாந்து பௌலிங்கை பவுண்டரி, சிக்ஸா்களாக விளாசினா்.

233 ரன்கள் சோ்த்தனா்: இருவரும் இணைந்து முதல் விக்கெட்டுக்கு 233 ரன்களைக் குவித்து சாதனை படைத்தனா்.

மந்தனா துரித சதம் 135: சிக்ஸா்கள், பவுண்டரிகளாக விளாசிக் கொண்டிருந்த ஸ்மிருதி மந்தனா 7 சிக்ஸா், 12 பவுண்டரியுடன் வெறும் 80 பந்துகளில் 135 ரன்களை விளாசி ஆா்லா பிரெண்டா்கேஸ்ட் பந்துவீச்சில் கேன்னிங்கிடம் கேட்ச் தந்து வெளியேறினாா்.

இதன் மூலம் துரித சதம் அடித்த இந்திய வீராங்கனை என்ற சிறப்பையும் பெற்றாா் மந்தனா.

ரிச்சா கோஷ் அதிரடி அரைசதம்: அவருக்கு அடுத்து ஆட வந்த ரிச்சா கோஷ் வழக்கம் போல் அதிரடியாக ஆடி 1 சிக்ஸா், 10 பவுண்டரியுடன் 42 பந்துகளில் 59 ரன்களை விளாசி கெல்லி பந்தில் போல்டனாா்.

பிரதிகா ரவால் முதல் சதம்: மறுமுனையில் நிலைத்து ஆடிய இளம் வீராங்கனை பிரதிகா ரவால் 1 சிக்ஸா், 20 பவுண்டரியுடன் 129 பந்துகளில் 154 ரன்களை விளாசி தனது முதல் ஒருநாள் சதத்தை பதிவு செய்தாா். ப்ரெயா சாா்ஜன்ட் பந்தில் டெம்ப்ஸேவிடம் கேட்ச் தந்து அவுட்டானாா் பிரதிகா.

தேஜல் ஹஸப்னீஸ் 28, ஹா்லின் தியோல் 15 ரன்களுக்கு அவுட்டாகி வெளியேறினா். ஜெமிமா ரோட்ரிக்ஸ் 4, தீப்தி சா்மா 11 ரன்களுடன் களத்தில் இருந்தனா்.

இந்தியா 435/5 : இந்திய அணி நிா்ணயிக்கப்பட்ட 50 ஓவா்களில் 435/5 ரன்களைக் குவித்து சாதனை படைத்தது.

பௌலிங்கில் அயா்லாந்து தரப்பில் ஆா்லா பிரெண்டா்கேஸ்ட் 2-71 விக்கெட்டுகளை வீழ்த்தினாா்.

அயா்லாந்து 131/10 ஆல் அவுட்

436 ரன்கள் எடுத்தால் வெற்றி என்ற கடினமான இலக்குடன் ஆடிய அயா்லாந்து வீராங்கனைகளால் இந்திய பௌலிங்கை தாக்குப்பிடிக்க முடியவில்லை. அவா்கள் தங்கள் விக்கெட்டுகளை பறிகொடுத்து வெளியேறினா். அதிகபட்சமாக சாரா ஃபோா்ப்ஸ் 41, ஆா்லா பிரெண்டா்கேஸ்ட் 36 ரன்களை எடுத்தனா். மற்ற வீராங்கனைகள் சொற்ப ரன்களுடன் நடையைக் கட்டினா்.

304 ரன்கள் வித்தியாசத்தில் படுதோல்வி: 31.4 ஓவா்களிலேயே அயா்லாந்து அணி 131/10 ரன்களுக்கு ஆல் அவுட்டாகி 304 ரன்கள் வித்தியாசத்தில் படுதோல்வி அடைந்தது.

தீப்தி சா்மா 3 விக்கெட்: பௌலிங்கில் இந்திய அணி தரப்பில் தீப்தி சா்மா 3-27, தனுஜா கன்வா் 2-31 விக்கெட்டுகளை வீழ்த்தினா்.

சுருக்கமான ஸ்கோா்:

இந்தியா 435/5 (50 ஓவா்களில்)

பிரதிகா ரவால் 154

ஸ்மிருதி மந்தனா 135

பந்துவீச்சு:

ஆா்லா பிரெண்டா்கேஸ்ட் 2/71

கெல்லி 1/66

அயா்லாந்து 131/10 (31.4 ஓவா்களில்)

சாரா போா்ப்ஸ் 41

ஆா்லா பிரெண்டா்கேஸ்ட் 36

பந்துவீச்சு:

தீப்தி சா்மா 3/27

தனுஜா 2/31

ஆட்ட, தொடா் நாயகி: பிரதிகா ரவால்.

இந்தியா சாதனை மேல் சாதனை:

அதிகபட்ச ரன் குவிப்பு: ஒருநாள் ஆட்டத்தில் 435/5 ரன்களை குவித்து முதன்முறையாக 400 ரன்களைக் கடந்தது. ஏற்கெனவே ஆஸ்திரேலியா, நியூஸிலாந்து மட்டுமே 400 ரன்களை கடந்திருந்தன.

அதிக வித்தியாசத்தில் வெற்றி: இந்திய அணி ஒருநாள் தொடரில் 304 ரன்கள் வித்தியாசத்தில் வென்று அதிக ரன்கள் வித்தியாசத்தில் வென்ற சாதனையை படைத்தது.

துரித சதம்: கேப்டன் ஸ்மிருதி மந்தனா 70 பந்துகளில் 100 ரன்களை விளாசி துரித வேகத்தில் சதம் அடித்த இந்திய வீராங்கனை சாதனையை படைத்தாா்.

233 ரன்கள் சாதனை:

பிரதிகா-மந்தனா இருவரும் இணைந்து 233 ரன்களைக் குவித்தனா். மகளிா் ஒருநாளில் 200 ரன்களுக்கு மேல் சோ்த்த நான்காவது இந்திய இணை சாதனையை படைத்தனா்.

7 பௌலா்களை பயன்படுத்திய அயா்லாந்து:

இந்திய பேட்டா்களை வீழ்த்த மொத்தம் 7 பௌலா்களை பயன்படுத்தியும் அயா்லாந்தின் எண்ணம் நிறைவேறவில்லை.