திருநெல்வேலி மாவட்டம் வள்ளியூா் பிளசண்ட் நகா், இ.பி.காலனி, வீட்டு வசதி வாரியக் குடியிருப்பு பகுதியில் தொடா் திருட்டுச் சம்பவங்கள் நடந்து வருவதால் பொதுமக்கள் அச்சமடைந்துள்ளனா்.
வள்ளியூா் பிளசண்ட் நகரைச் சோ்ந்தவா் ரதி. வீட்டில் தனியாக வசித்து வருகிறாா். இவா், திருவிழாவிற்காக தனது உறவினா் வீட்டிற்கு சென்றிருந்தாா். நான்கு நாள்களுக்குப் பின்னா் வீட்டிற்கு வந்து பாா்த்தபோது, கதவு உடைக்கப்பட்டு பீரோவில் இருந்த ரூ.3 லட்சம் மதிப்பிலான நகைகள் திருடப்பட்டிருந்தன.
இது தொடா்பாக, ஏா்வாடி காவல் நிலையத்தில் ரதி புகாா் செய்தாா். போலீஸாா் வழக்குப் பதிவு செய்து, அந்தப் பகுதியில் உள்ள கண்காணிப்பு கேமரா பதிவுகளை ஆய்வு செய்து வருகின்றனா்.
இந்நிலையில், கடந்த மாதம் வள்ளியூா் வீட்டு வசதி வாரியக் குடியிருப்பு பகுதியில் பெண் வேடம் அணிந்து வந்த மா்ம நபா் வீட்டில் தனியாக இருந்த மூதாட்டியை கொலை செய்து, தங்க நகைகளை கொள்ளையடித்துச் சென்றாா். வீட்டு வசதி வாரியக் குடியிருப்பு பகுதியிலும் தொடா் திருட்டுகள் நடந்து வருகின்றன.
வள்ளியூா் பகுதியில் வீட்டில் தனியாக இருக்கும் பெண்களை நோட்டமிட்டு, மா்ம நபா்கள் கொள்ளைகளிலும் கொலைகளிலும் ஈடுபட்டு வருகின்றனா்.
எனவே, இரவு நேரம் கூடுதலாக கண்காணிப்புக் காவலா்களை நியமிக்க வேண்டும் என வள்ளியூா் பகுதி மக்கள் கோரிக்கை வைக்கின்றனா்.
