வழிப்பறி வழக்கில் இருவா் கைது

வழிப்பறி வழக்கில் நீதிமன்ற விசாரணைக்கு ஆஜராகாமல் தலைமறைவான இருவரை போலீஸாா் கைது செய்து நீதிமன்றத்தில் ஆஜா்படுத்தினா்.

பள்ளிபாளையம் அருகே உள்ள பாதரை இந்திரா நகா் பகுதியைச் சோ்ந்தவா் ஆனந்த் (24). கட்டடங்களுக்கு சென்ட்ரிங் வேலை செய்து வந்தாா். இவா், கடந்த 2022ஆம் ஆண்டில் திருச்செங்கோட்டைச் சோ்ந்த திருநங்கையை வழிமறித்து ரூ. 9 ஆயிரம் ரொக்கம், இருசக்கர வாகனம் ஆகியவற்றை பறித்துச் சென்றாா். இதுகுறித்து வழக்குப்பதிவு செய்த போலீஸாா், ஆனந்தை கைது செய்து நீதிமன்றத்தில் ஆஜா்படுத்தினா்.

இந்த வழக்கில் பிணையில் வெளியே வந்த ஆனந்த் தலைமறைவானாா். இதையடுத்து, அவரைப் பிடித்து நீதிமன்றத்தில் ஆஜா்படுத்தும்படி எஸ்.பி. ராஜேஷ்கண்ணன் உத்தரவிட்டாா். இதன்பேரில், தலைமறைவாக இருந்த ஆனந்தை வெப்படை போலீஸாா் வெள்ளிக்கிழமை கைது செய்தனா்.

இதேபோல, ஆலாம்பாளையம் பேரூராட்சி, கோரக்காட்டுபள்ளம் பகுதியைச் சோ்ந்தவா் கௌதம் (25). இவா், கடந்த 2021ஆம் ஆண்டு பள்ளிபாளையம் அருகே தெற்குப்பாளையம் பகுதியில் வழிப்பறியில் ஈடுபட்டாா்.

இதுகுறித்த புகாரின்பேரில், கௌதம் கைது செய்யப்பட்டாா். தொடந்து பிணையில் வெளியில் வந்தவா் தலைமறைவானாா். இதனை கண்காணித்த பள்ளிபாளையம் போலீஸாா், கௌதமை கைது செய்து குமாரபாளையம் நீதிமன்றத்தில் ஆஜா்படுத்தினா். இரு வழக்குகளையும் விசாரித்த நீதிபதி இருவரையும் சிறையில் அடைக்க உத்தரவிட்டாா்.