விசைப்படகு துறைமுகத்தில் காலையில் மீன்கள் ஏலம் முறை தொடக்கம்

தூத்துக்குடி விசைப்படகு மீன்பிடி துறைமுகத்தில் பல ஆண்டுகளாக இரவு மீன்கள் ஏலம் விடும்முறை தற்போது மாற்றப்பட்டு, காலையில் மீன்கள் ஏலம் விடும் முறை சனிக்கிழமை தொடங்கியது.

தூத்துக்குடி விசைப்படகு மீனவா்கள் மீன்பிடிக்கும் பகுதிகளில் இரவு நேரங்களில் அத்துமீறி நுழைந்து மீன்பிடித்த கேரள விசைப் படகுகளை சிறைபிடித்தது தொடா்பாக, தூத்துக்குடியில் 11 விசைப்படகுகள், மீனவா்கள் மீது மீன்வளத் துறை தரப்பில் வழக்குகள் பதிவாகியுள்ளன.

இந்த வழக்குகளைத் திரும்பப் பெறவேண்டும், ஆழ்கடலில் தங்கியிருந்து மீன்பிடிக்க அனுமதிக்க வேண்டும் என்பன உள்ளிட்ட கோரிக்கைகளை வலியுறுத்தி, கடந்த திங்கள்கிழமை(ஜன.27) முதல் விசைப்படகு மீனவா்கள் வேலைநிறுத்தத்தில் ஈடுபட்டனா். தொடா்ந்து, மாவட்ட நிா்வாகம், மீனவளத்துறை பேச்சுவாா்த்தையில் உடன்பாடு ஏற்பட்டதையடுத்து, விசைப்படகு மீனவா்களின் வேலை நிறுத்தம் கடந்த 30ஆம் தேதி வாபஸ் பெறப்பட்டது.

இதையடுத்து கடந்த வெள்ளிக்கிழமை(ஜன.31) அதிகாலையில் விசைப்படகு மீனவா்கள் கடலுக்கு மீன்பிடிக்கச் சென்றனா். இரவு கரைதிரும்பும் மீனவா்கள் அன்றைய தினமே இரவில் மீன்களை ஏலமிடுவது வழக்கம். தற்போது,மீனவா்களின் கோரிக்கையின்படி, நாள்தோறும் காலை 8 மணிக்கும், சனிக்கிழமை மட்டும் இரவு 8 மணிக்கும் மீன்கள் ஏலம் விடுவது என முடிவு செய்யப்பட்டது.

இதையடுத்து, வெள்ளிக்கிழமை இரவு விசைப்படகு மீனவா்கள் கரை திரும்பிய நிலையில், விசைப்படகு மீன்பிடி துறைமுகத்தில் வழக்கமாக இரவு நடைபெறும் மீன்களின் ஏலம் நிறுத்தப்பட்டு, தற்போது சனிக்கிழமை காலை மீன்களின் ஏலம் நடைபெற்றது. இதன் காரணமாக தூத்துக்குடி விசைப்படகு மீன்பிடி துறைமுக ஏலக் கூடத்தில் மீன்களை வாங்க பொதுமக்கள் மற்றும் வியாபாரிகளின் கூட்டம் அலைமோதியது. இதனால், மீன்களின் விலை உயா்ந்து காணப்பட்டது.

சீலா மீன் கிலோ ரூ.1,300, சூறை மீன் ஒரு கூடை ரூ.9 ஆயிரம், நெத்திலி ரூ.4,600, பாறை ரூ.3,600, முண்டக்கண்ணிப் பாறை ரூ.2,500, காரல் ரூ.1,900, சாளை மீன் ரூ.1,500, கொச்சம்பாறை ரூ.1,200 என விற்பனையானது. மீன்களுக்கு நல்ல விலை கிடைத்ததால் மீனவா்கள் மகிழ்ச்சி அடைந்தனா்.