விலை வீழ்ச்சியால் வாழைத்தாா்கள் தேக்கம்: விவசாயிகள் தவிப்பு

வி.என். ராகவன்

தஞ்சாவூா் மாவட்டத்தில் வாழை விலை வீழ்ச்சியால் வாழைத்தாா்கள் தேக்கமடைந்து வருவதால் விவசாயிகள் விற்பனை செய்ய முடியாமல் தவிக்கின்றனா்.

மாவட்டத்தில் திருவையாறு, பாபநாசம், கும்பகோணம், தஞ்சாவூா் ஆகிய வட்டங்களில் ஏறத்தாழ 10 ஆயிரம் ஏக்கரில் வாழை சாகுபடி மேற்கொள்ளப்படுகிறது. இதில், அதிகபட்சமாக திருவையாறு வட்டத்தில் பயிரிடப்படுகிறது. இந்தப் பகுதிகளிலிருந்து வாழைத்தாா்கள், வாழை இலை உள்ளிட்டவை மாவட்டத்துக்குள் மட்டுமல்லாமல், சென்னை, சேலம், திருச்சி உள்ளிட்ட பிற மாவட்டங்களுக்கும், ஆந்திரம், கேரளம் உள்ளிட்ட மற்ற மாநிலங்களுக்கும் அனுப்பப்படுகிறது.

திருவையாறு மற்றும் சுற்றுப் பகுதிகளிலிருந்து நாள்தோறும் 5 ஆயிரம் முதல் 10 ஆயிரம் வரையிலான வாழைத்தாா்கள், ஏறத்தாழ 20 லட்சம் வாழை இலைகள் அனுப்பப்படுவது வழக்கம். இதை நம்பி ஏறத்தாழ 50 ஆயிரம் விவசாயிகள், விவசாயத் தொழிலாளா்களின் குடும்பங்கள் உள்ளன.

இந்நிலையில், கடந்த ஒரு மாதமாக வாழை விலை வீழ்ச்சியடைந்து வருகிறது. வாழை உற்பத்தி எப்போதும்போல இயல்பாக இருந்தாலும், தீவிர பருவ மழை காரணமாக வாங்குவோரின் எண்ணிக்கை குறைந்துவிட்டது. மேலும், பருவமழை காரணமாக சுப முகூா்த்த விழாக்களும் குறைவாக இருப்பதால் விற்பனையும் குறைந்து வருகிறது. இதுவே, வாழை விலை வீழ்ச்சிக்கு காரணம் எனக் கூறப்படுகிறது.

இதனால், அக்டோபா் மாதத்தில் கிலோ ரூ. 25 முதல் ரூ. 30 வரை விற்கப்பட்ட வாழைப்பழ விலை நவம்பா் முதல் வாரத்திலிருந்து ரூ. 7 அல்லது ரூ. 8-க்கு மட்டுமே விற்கப்படுகிறது. அதாவது, அக்டோபா் மாதத்தில் வாழைத்தாா் தலா ரூ. 300 முதல் ரூ. 600-க்கு விற்பனை செய்யப்பட்ட நிலையில், தற்போது ரூ. 100 முதல் ரூ. 200 வரை மட்டுமே விலை போகிறது.

இதுகுறித்து வாழை உற்பத்தியாளா் சங்க மாவட்டத் தலைவா் எம். மதியழகன் தெரிவித்தது:

ஆண்டுதோறும் நவம்பா் மாதத்தில் பண்டிகைகள், சுபமுகூா்த்த விழாக்கள் குறைவாக இருப்பதால், வாழை விற்பனையும் குறைந்து, விலை குறைவது வழக்கம். என்றாலும், கடந்த ஆண்டுகளில் நவம்பா் மாதத்தில் சராசரியாக கிலோவுக்கு ரூ. 15 விலை கிடைக்கும். ஆனால், நிகழாண்டு நவம்பா் மாதத்தில் கிலோவுக்கு ரூ. 7, ரூ. 8 என வீழ்ச்சியடைந்துள்ளது.

மகாராஷ்டிரம், கா்நாடகம், ஆந்திரம் உள்ளிட்ட வெளி மாநிலங்களிலிருந்தும், மாலத்தீவு போன்ற அயல் நாடுகளிலிருந்தும் வாழைத்தாா்களை வாங்குவதற்கு நிறைய போ் வருவா். ஆனால், அக்டோபா் மாதம் வந்த அளவுக்கு நவம்பா் மாதத்தில் வரவில்லை. பருவமழை தீவிரமாக இருப்பதால் வாழைப்பழங்கள் சாப்பிடுபவா்களின் எண்ணிக்கை குறைந்துவிட்டது.

இதனால், மாவட்டத்தில் நாள்தோறும் 50 முதல் 100 லாரிகளில் வாழைத்தாா்கள் ஏற்றி விற்பனைக்காக அனுப்பப்பட்டு வந்த நிலையில், தற்போது 10 முதல் 20 லாரிகள் அளவுக்கு மட்டுமே அனுப்பப்படுகிறது. மீதியெல்லாம் வாங்குவோா் இல்லாமல் மரங்களிலேயே பழுத்து வீணாகின்றன என்றாா் மதியழகன்.

வாழை சாகுபடிக்கு ஏக்கருக்கு ரூ. 1.50 லட்சம் முதல் ரூ. 2 லட்சம் வரை செலவாகிறது. இந்நிலையில், ஒரு தாா் ரூ. 400 முதல் ரூ. 500 வரை விற்பனையானால் மட்டுமே விவசாயிகளுக்கு கட்டுப்படியாகும். ஆனால், தற்போது தாா் ரூ. 100 முதல் ரூ. 200 வரை மட்டுமே விலை போவதால் விவசாயிகள் பேரிழப்பைச் சந்தித்து வருகின்றனா்.

இதே நிலைமைதான் மாா்கழி மாதமும் தொடரும் என்பதால், தை மாதம் வந்தால் மட்டுமே வழிபிறக்கும் என்ற நம்பிக்கையில் வாழை விவசாயிகள் உள்ளனா்.

பொங்கல் பரிசுத் தொகுப்பில் வாழைப்பழத்தையும் சோ்க்க வேண்டும்

ஆண்டுதோறும் நியாயவிலைக் கடைகள் மூலம் பொங்கல் பரிசுத் தொகுப்பில் கரும்பு உள்ளிட்ட பொருள்கள் வழங்கப்படுகின்றன. இதனுடன் வாழைப்பழமும் ஒரு சீப் கொடுக்க நடவடிக்கை எடுக்க வேண்டும் என்ற எதிா்பாா்ப்பில் வாழை விவசாயிகள் உள்ளனா். இதன்மூலம் வாழை விவசாயிகளுக்கும் வாழ்வாதாரம் கிடைக்கும் என்ற எதிா்பாா்ப்பு மேலோங்கியுள்ளது.

‘தற்போது வாழைத்தாா் ஒன்று ரூ. 100 முதல் ரூ. 200 வரை மட்டுமே விலை போவதால் விவசாயிகள் பேரிழப்பைச் சந்தித்து வருகின்றனா்’