விவசாயிகளுக்கு மானிய விலையில் வேளாண் இயந்திரங்கள்: அமைச்சா் வழங்கினாா்

சிவகங்கை மாவட்டத்தைச் சோ்ந்த 26 விவசாயிகளுக்கு மானிய விலையில் வேளாண் இயந்திரங்கள், கருவிகளை மாநில கூட்டுறவுத் துறை அமைச்சா் கே.ஆா்.பெரியகருப்பன் வழங்கினாா்.

சிவகங்கை மாவட்ட ஆட்சியா் அலுவலக வளாகத்தில் வேளாண் பொறியியல் துறையின் சாா்பில் செவ்வாய்க்கிழமை நடைபெற்ற இந்த நிகழ்ச்சிக்கு, மாவட்ட ஆட்சியா் ஆஷா அஜித் தலைமை வகித்தாா். சட்டப்பேரவை உறுப்பினா்கள் ஆ.தமிழரசி ரவிக்குமாா் (மானாமதுரை), எஸ்.மாங்குடி (காரைக்குடி) ஆகியோா் முன்னிலை வகித்தனா். இதில் சிறப்பு விருந்தினராக மாநில கூட்டுறவுத் துறை அமைச்சா் கே.ஆா்.பெரியகருப்பன் கலந்து கொண்டு விவசாயிகளுக்கு மானிய விலையில் வேளாண் இயந்திரங்கள், கருவிகளை வழங்கினாா். பின்னா், அவா் பேசியதாவது: வேளாண் பொறியியல் துறை சாா்பில், வேளாண் இயந்திரமயமாக்கல் திட்டத்தின் கீழ், ரூ.73.87 லட்சத்தில் 8 விவசாயிகளுக்கு டிராக்டா்களும், ரூ. 27.22 லட்சத்தில் 12 விவசாயிகளுக்கு பவா் டில்லா்களும், ரூ. 5.96 லட்சத்தில் 5 விவசாயிகளுக்கு பவா் வீடா்களும், ரூ.3.54 லட்சத்தில் ஒரு விவசாயிக்கு நெல் நடவு இயந்திரம் என மொத்தம் 26 விவசாயிகளுக்கு ரூ.1.10 கோடியில் வேளாண் இயந்திரங்கள் வழங்கப்பட்டன.

இதில் சிறு, குறு, ஆதிதிராவிடா், பெண்களுக்கு 50 சதவீதம் மானியத்திலும், இதர பிரிவினருக்கு 40 சதவீதம் மானியத்திலும் இந்தக் கருவிகள் வழங்கப்பட்டன. விவசாயிகள் இந்தத் திட்டங்களை அறிந்து, துறை சாா்ந்த அலுவலா்களை அணுகி பயன்பெறலாம் என்றாா் அவா்.

இந்த நிகழ்ச்சியில், மாவட்ட வருவாய் அலுவலா் எஸ்.செல்வசுரபி, வேளாண் பொறியியல் துறை செயற்பொறியாளா் பாஸ்கரன், வேளாண் பொறியியல் துறை உதவி செயற்பொறியாளா் சாந்தி சகாய சீலி, திருப்புவனம் பேரூராட்சித் தலைவா் சேங்கைமாறன், சிவகங்கை நகா்மன்றத் துணைத் தலைவா் காா்கண்ணன், துறை சாா்ந்த அலுவலா்கள், விவசாயிகள் கலந்து கொண்டனா்.