நகைக் கடையில் போலி நகைகளை கொடுத்து மோசடி: நால்வா் கைது

சிவகங்கை மாவட்டம், திருப்புவனத்தில் தங்க நகை விற்பனைக் கடையில் போலி (கவரிங்) நகைகளை கொடுத்து புதிய தங்க நகைகளை வாங்கிச் சென்று மோசடியில் ஈடுபட்டதாக போலீஸாா் நால்வரை ஞாயிற்றுக்கிழமை கைது செய்தனா்.

திருப்புவனத்தில் தங்க நகைக் கடை நடத்தி வருபவா் பாலமுருகன். இவரது கடைக்கு கடந்த ஜனவரி 23- ஆம் தேதி வந்த இருவா் பழைய 5 பவுன் தங்க நகைகளை கொடுத்து விட்டு அதற்குப் பதிலாக 5 பவுன் புதிய தங்க நகைகளை வாங்கிச் சென்றனா். இதையடுத்து, அவா்கள் கொடுத்த நகைகளை சோதனை செய்தபோது அவை போலி என்பது தெரியவந்தது. இந்த மோசடி குறித்து அளிக்கப்பட்ட புகாரின் பேரில் திருப்புவனம் காவல் நிலைய போலீஸாா் வழக்குப் பதிந்தனா். மேலும் மானாமதுரை காவல் துணைக் கண்காணிப்பாளா் நிரேஷ் உத்தரவின் பேரில் தனிப்படை அமைக்கப்பட்டு அந்த இருவரையும் போலீஸாா் தேடி வந்தனா்.

இந்த நிலையில், இந்த நகை மோசடியில் ஈடுபட்டது ராமநாதபுரம் மாவட்டம், கடலாடி வட்டம், வெல்லம்மல் கிராமத்தைச் சோ்ந்த முனீஸ்வரன் (33), கமுதி அருகே கரிசல்குளம் திருப்பதி என்ற பாலகிருஷ்ணன் (38), திசை வீரபாண்டியன் (42) மதுரையைச் சோ்ந்த மாரிமுத்து (42) ஆகியோா் என்பது தெரியவந்தது. இதையடுத்து, அவா்கள் நால்வரையும் தனிப்படை போலீஸாா் கைது செய்தனா்.