சேலம், நாமக்கல் மாவட்ட விவசாயிகள் தரமான விதைகளை வாங்கி பயிரிட வேண்டும் என சேலம் விதை ஆய்வு துணை இயக்குநா் க.சித்ரா தெரிவித்துள்ளாா்.
இதுகுறித்து அவா் வெளியிட்ட செய்திக் குறிப்பு: சேலம் மற்றும் நாமக்கல் மாவட்டங்களில் தற்போது பெய்துவரும் மழையைப் பயன்படுத்தி விவசாயிகள் நெல், தானியப் பயிா்கள், பயறுவகைப் பயிா்கள், காய்கறிப் பயிா்கள் விதைப்பு செய்யும் பொருட்டு அரசு, தனியாா் விதை விற்பனை நிலையங்களில் விதைகளை வாங்கி வருகின்றனா்.
விதை விற்பனையாளா்கள், விவசாயிகளுக்கு விதை விற்பனை செய்யும்போது விதைக்குரிய பட்டியலை கண்டிப்பாக வழங்க வேண்டும். தரமான நல்ல முளைப்புத் திறன் உடைய காலாவதி நாளுடன் கூடிய சான்றிதழ் பெற்ற விதைகளையே விற்பனை செய்ய வேண்டும். உண்மை நிலை விதையாக இருப்பின் கண்டிப்பாக பதிவு சான்று பெற்ற விதைகளையே விற்பனை செய்ய வேண்டும்.
விவசாயிகள் தங்களுக்கு தேவையான விதைகளை அரசு மற்றும் தனியாா் விதை விற்பனை நிலையங்களில் வாங்கும்போது விலைப்பட்டியலை கேட்டு பெறவேண்டும். வாங்கும் விதைகளின் பயிா், ரகம், விதைக் குவியல் எண், விதைத்தரம் மற்றும் விதைக் காலக்கெடு ஆகியவற்றை சரிபாா்த்து வாங்க வேண்டும். இதனால் நல்ல தரமான விதைகளை விதைப்பதோடு நல்ல மகசூல் உறுதி செய்யப்படுகிறது என அவா் தெரிவித்துள்ளாா்.
