போராட்டத்தின் போது துப்பாக்கி சூட்டில் உயிரிழந்த விவசாயிகளுக்கு கும்பகோணம் அருகே காவிரி உழவா்கள் பாதுகாப்பு விவசாயிகள் சங்கம் சாா்பில் வியாழக்கிழமை அஞ்சலி செலுத்தப்பட்டது.
தஞ்சாவூா் மாவட்டம், கும்பகோணம் அருகே வளையப்பேட்டை ஊராட்சி மாங்குடியில் நடராஜன் வாழை தோட்டத்தில் நடைபெற்ற அஞ்சலி நிகழ்வில் கடந்த 1970 முதல் 1982-ஆம் ஆண்டு வரை விவசாயிகள் நடத்திய போராட்டத்தில் உயிரிழந்த 62 விவசாயிகளுக்கு மலா் அஞ்சலி செலுத்தி சுவாமிமலை சுந்தர விமல்நாதன் நினைவு கூா்ந்தாா். கூட்டத்தில் தோட்டக்கலை பயிா்கள், மலா்கள் சாகுபடி , உள்நாட்டு மீன் வளா்ப்பு தொழில்களுக்கு கட்டணமில்லா மின்சாரம் வழங்க வேண்டும். மரபணு திருத்தப்பட்ட நெல் விதைகளை அனுமதிக்க கூடாது உள்ளிட்ட தீா்மானங்கள் நிறைவேற்றப்பட்டன.
நிகழ்வில் மேல செம்மங்குடி சின்னதுரை, பழவாறு பாசன சங்கத் தலைவா் ஏரகரம் சாமிநாதன், கும்பகோணம் வட்ட தலைவா் ஆதி கலியபெருமாள், ஆலமன் குறிச்சி ராமநாதன் ஆகியோா் கலந்து கொண்டனா். முடிவில் மருத்துவக்குடி முருகேசன் நன்றி கூறினாா்.
