வெப்பத்தை தணிக்க சென்னிமலை முருகன் கோயில் படிக்கட்டுகள், பிரகாரத்தில் வெள்ளை நிற பெயிண்ட்

சென்னிமலை முருகன் கோயிலுக்கு செல்லும் பக்தா்களுக்கு வெப்பத்தினால் ஏற்படும் சிரமத்தை தவிா்க்க படிக்கட்டுகள் மற்றும் பிரகாரத்தில் வெள்ளை நிற பெயிண்ட் அடிக்கப்பட்டுள்ளது.

சென்னிமலை முருகன் கோயில் மலைப் பாதையில் கடந்த ஒரு மாதத்துக்கு மேலாக சீரமைப்பு பணிகள் நடைபெற்று வருகின்றன. இதனால், மலைப் பாதை வழியாக பக்தா்கள் தங்கள் வாகனங்களில் செல்ல தடை விதிக்கப்பட்டுள்ளது. எனவே, பக்தா்கள் 1320 படிக்கட்டுகள் வழியாக ஏறிச் சென்று முருகனை தரிசித்து வருகின்றனா்.

பக்தா்கள் படிக்கட்டுகள் வழியாக செல்லும்போது வெயிலின் தாக்கம் காரணமாக ஏற்பட்ட சூட்டினால் நடந்து செல்ல சிரமப்பட்டு வந்தனா்.

இதனால் பக்தா்களின் நலன் கருதி படிக்கட்டுகள் மற்றும் கோயில் பிரகாரங்களில் ரூ.5 லட்சம் மதிப்பில் வெண்மை நிற (கூலிங்) பெயிண்ட் அடிக்கப்பட்டுள்ளது. படிக்கட்டுகளில் ஏற்கெனவே 30 மின் விளக்குகள் உள்ளன. பாதுகாப்பு மற்றும் அதிக வெளிச்சம் தரும் வகையில் மேலும் 25 மின் விளக்குகள் பொருத்தும் பணி நடைபெற்று வருகிறது.