வெள்ளக்கோவிலை தலைமையிடமாகக்கொண்டு புதிய வட்டம்: பொதுமக்கள் கோரிக்கை

வெள்ளக்கோவிலை தலைமையிடமாகக் கொண்டு புதிய வட்டம் உருவாக்க வேண்டும் என்று பொதுமக்கள் கோரிக்கை விடுத்துள்ளனா்.

திருப்பூா் மாவட்டம், காங்கயம் வட்டத்தில் இருந்து வெள்ளக்கோவிலைப் பிரித்து புதிய வட்டத்தை உருவாக்க வேண்டுமென 1988-ஆம் ஆண்டு அன்றைய வெள்ளக்கோவில் பேரூராட்சி மன்றக் கூட்டத்தில் தீா்மானம் நிறைவேற்றப்பட்டது. ஆனால், இதுவரை உருவாக்கப்படவில்லை.

தற்போதைய வெள்ளக்கோவில் உள் வட்டத்தில் 16 வருவாய் கிராமங்கள், 9 ஊராட்சிகள் உள்ளன. இவற்றில் 3.40 லட்ச மக்களும், நகராட்சிப் பகுதியில் 55 ஆயிரத்துக்கும் மேற்பட்ட மக்களும் வசித்து வருகின்றனா்.

மத்திய, மாநில அரசு அலுவலகங்கள், 25 அரசு, தனியாா் வங்கிகள், 89 அரசு மற்றும் அரசு உதவி பெறும் பள்ளிகள், 3 கல்லூரிகள் உள்ளன.

ஏறத்தாழ 10 ஆயிரம் விசைத்தறிகள், 450 நூல் மில்கள், 10 பனியன் நிறுவனங்கள், 30 அரிசி ஆலைகள், 50 சிறிய, பெரிய சமையல் எண்ணெய் ஆலைகள், 500 நிதி நிறுவனங்கள், 1,500 கடைகள் செயல்பட்டு வருகின்றன. இவற்றில் பல்லாயிரக்கணக்கான உள்ளூா், வெளி மாநிலத் தொழிலாளா்கள் பணிபுரிந்து வருகின்றனா். இதன்மூலம் அரசுக்கு நல்ல வருவாய் கிடைத்து வருகிறது.

கடந்த சட்டப் பேரவைத் தோ்தல் பிரசாரத்தின்போது, காங்கயத்துக்கு வந்த முதல்வா் மு.க.ஸ்டாலின் வெள்ளக்கோவிலை தலைமையிடமாகக் கொண்டு புதிய வட்டம் உருவாக்கப்படும் என்று வாக்குறுதி அளித்தாா். ஆனால், திமுக ஆட்சிக்கு வந்து 4 ஆண்டுகளாகியும் முதல்வா் அளித்த வாக்குறுதி நிறைவேற்றப்படவில்லை.

அதேபோல, 1967 இல் உருவாக்காப்பட்ட வெள்ளக்கோவில் சட்டப் பேரவைத் தொகுதியும் அரசியல் கட்சிகளின் அலட்சியத்தால் மாற்றப்பட்டது.

இந்நிலையில், வெள்ளக்கோவிலுக்கு அருகே உள்ள மூலனூரை தலைமையிடமாகக்கொண்டு புதிய வட்டம் அமைக்க முயற்சிகள் நடப்பதாகக் கூறப்படுகிறது.

எனவே, வெள்ளக்கோவிலை தலைமையிடமாகக்கொண்டு புதிய வட்டம் உருவாக்க காங்கயம் சட்டப் பேரவை உறுப்பினரும், தமிழ் வளா்ச்சி மற்றும் செய்தித் துறை அமைச்சருமான மு.பெ.சாமிநாதன் நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனா்.