Ind Vs Eng : 'கம்பீர் எங்களுக்கு சுதந்திரம் கொடுத்திருக்கிறார்!' - பூரித்த சூர்யகுமார்

இந்தியா - இங்கிலாந்து இடையேயான முதல் டி20 தொடர் ஈடன் கார்டனில் நடந்து முடிந்திருக்கிறது. இந்தப் போட்டியில் இந்திய அணி 7 விக்கெட் வித்தியாசத்தில் வென்றிருக்கிறது. பௌலிங்கில் வருண் சக்கரவர்த்தியும் பேட்டிங்கில் அபிஷேக் சர்மாவும் கலக்கினர். போட்டி முடிந்த பிறகு பேசிய இந்திய அணியின் கேப்டன் சூர்யகுமார், 'கோச் கவுதம் கம்பீர் எங்களுக்கு நிறைய சுதந்திரம் கொடுத்திருக்கிறார்.' என பூரித்து பேசியிருக்கிறார்.

சூர்யகுமார் யாதவ் பேசியதாவது, 'டாஸை வென்று நாங்கள் போட்டியை தொடங்கிய விதமே சிறப்பாக இருந்தது. ஒவ்வொரு பௌலரும் அவரவருக்கென ஒரு திட்டத்தை வைத்துக் கொண்டு அதை களத்தில் சிறப்பாகவும் செயல்படுத்தினார்கள். மூன்று ஸ்பின்னர்களை கொண்டு ஆடியதை பற்றி கேட்கிறீர்கள். அதுதான் எங்களின் பலம். தென்னாப்பிரிக்காவுக்கு எதிராக கூட அப்படித்தான் ஆடியிருந்தோம். புதிய பந்தில் பந்துவீசும் பொறுப்பை ஹர்திக் ஏற்றுக் கொண்டார். அதனால் என்னால் கூடுதலாக ஒரு ஸ்பின்னரை வைத்து ஆட முடிகிறது. வருண் சக்கரவர்த்தி தன்னுடைய பௌலிங்கை ரொம்பவே எளிமையாக வைத்திருக்கிறார். அவர் என்ன செய்யப் போகிறார் என்பது அவருக்கு தெரிகிறது.

அதை மனதில் வைத்துக் கொண்டு தெளிவாக பயிற்சிகளை மேற்கொள்கிறார். அதுதான் அவரை சிறப்பான வீரராக மாற்றுகிறது. அர்ஷ்தீப் சிங் அனுபவத்தின் வழி நிறைய கற்றுக்கொள்கிறார். கூடுதல் பொறுப்புகளையும் தன் மீது சுமந்து கொள்கிறார். கவுதம் கம்பீர் எங்களுக்கு நிறைய சுதந்திரம் கொடுத்திருக்கிறார்.

2024 டி20 உலகக்கோப்பையில் ஆடியதை விட கொஞ்சம் வித்தியாசமாக ஆட வேண்டும் என்பதுதான் எங்களின் திட்டம். பீல்டிங் கோச்சுடன் இணைந்து தீவிரமாக பயிற்சி மேற்கொள்கிறோம். சிறிய வாய்ப்பிருந்தாலும் அதை கேட்ச்சாக மாற்ற கடுமையாக முயற்சிக்கிறோம். அதுதான் எங்களின் பீல்டிங்கை தரமானதாக மாற்றுகிறது.' என்றார்.