Arun Vijay : 'என் பசங்களும் மெடல் ஜெயிச்சு போடியம்ல ஏறணும்!' - தந்தையாக உருகிய அருண் விஜய்

டெல்லியில் நடந்த ஜூனியர் நேஷனல் சாம்பியன்ஷிப் குதிரையேற்ற போட்டியில் 18 பதக்கங்களை வென்று வந்த தமிழகத்தின் இளம் வீரர்களுக்கு சென்னை குதிரையேற்ற மையம் சார்பில் பாராட்டு விழா நடத்தப்பட்டது. சிறப்பு விருந்தினராக கலந்துகொண்ட நடிகர் அருண் விஜய் வெற்றி பெற்றவர்களை பாராட்டியதோடு குதிரைகளை ஓட்டியும் மகிழ்ந்தார்.

நிகழ்வில் அருண் விஜய் பேசியதாவது, ''எனக்கு குதிரைகளை ரொம்பவே பிடிக்கும். குதிரை ஓட்டவும் தெரியும். கோத்தகிரியில் பள்ளியில் படித்த போதுதான் குதிரை ஓட்ட கற்றுக்கொண்டேன். அப்போது ரேஸ் கோர்ஸிலிருந்து இரண்டு குதிரைகளை எங்களுடைய பள்ளிக்கு கொண்டு வந்திருந்தார்கள். முதல் முறையாக அந்த குதிரைகளின் மீது ஏறி அமர்ந்த போது அத்தனை புத்துணர்ச்சியாக இருந்தது. குதிரைகளுடன் பழகுவது கடினமான விஷயம். ஆனால், பழகிவிட்டால் அது நல்ல அனுபவமாக இருக்கும். இங்கே தேசிய அளவிலான போட்டிகளுக்கு சென்று 18 பதக்கங்களை வென்று வந்திருக்கிறார்கள். அது அவ்வளவு எளிதான விஷயம் அல்ல. தமிழ்நாட்டில் இந்த 'Equestrian' விளையாட்டு வளர்ந்து வருகிறது. என்னுடைய குழந்தைகளும் இங்கேதான் இரண்டு வருடமாக பயிற்சி மேற்கொண்டு வருகிறார்கள்.

ஒரே இடத்தில் 80 க்கும் மேற்பட்ட குதிரைகளை பராமரித்து சிறப்பான முறையில் பயிற்சியளித்து வருகிறார்கள். ஒரு நாள் என்னுடைய குழந்தைகளும் இதே மாதிரி பதக்கங்களை வென்று போடியத்தில் ஏறி நிற்க வேண்டும் என விரும்புகிறேன்." என்றார்.

மேலும் பேசியவர், ``வணங்கான் படம் பெரிய வெற்றியை அடைந்திருப்பதில் மகிழ்ச்சி. எல்லா புகழும் பாலா சாருக்குதான் செல்ல வேண்டும். என் மீது கூடுதல் பொறுப்பு ஏறியிருப்பதாக உணர்கிறேன். இன்னும் பெரிய பெரிய படங்களாக மக்களுக்குப் பிடிக்கும் வகையில் செய்து அவர்களை ஈர்க்க வேண்டும் என விரும்புகிறேன்" என்றார்.