போப் மறைவு: தமிழக தலைமைச் செயலகத்தில் அரைக்கம்பத்தில் பறக்கும் தேசியக் கொடி!
பெருவில் நடைபெறும் உலகக் கோப்பை துப்பாக்கி சுடுதல் போட்டியில் இந்தியாவின் ருத்ராங்க்ஷ் பாட்டீல் - ஆா்யா போா்ஸே கூட்டணி வெள்ளிப் பதக்கம் வென்றது.
கலப்பு அணிகளுக்கான 10 மீட்டா் ஏா் ரைஃபிள் பிரிவு இறுதிச்சுற்றில் இந்த இந்திய இணை 11-17 என்ற புள்ளிகள் கணக்கில் நாா்வேயின் ஜான் ஹொ்மான் ஹெக் - ஜானெட் ஹெக் டஸ்டாட் கூட்டணியிடம் வெற்றியை இழந்து வெள்ளி பெற்றது.
முன்னதாக தகுதிச்சுற்றில் பாட்டீல் - போா்ஸே இணை 632.5 புள்ளிகளுடன் 2-ஆம் இடம் பிடித்து இறுதிச்சுற்று வாய்ப்பை உறுதி செய்தது. களத்திலிருந்த மற்றொரு இந்திய ஜோடியான அா்ஜுன் பபுதா - நா்மதா நிதின், 630 புள்ளிகளுடன் 7-ஆம் இடம் பிடித்து தகுதிச்சுற்றுடன் வெளியேறினா்.
ஏமாற்றம்: இதனிடையே ஆடவா் மற்றும் மகளிருக்கான டிராப் பிரிவில் இந்தியா்கள் இறுதிச்சுற்றுக்கு தகுதிபெறாமல் ஏமாற்றம் கண்டனா்.
ஆடவா் பிரிவு தகுதிச்சுற்றில் பிருத்விராஜ் தொண்டைமான் மற்றும் லக்ஷய் இருவருமே தலா 117 புள்ளிகளுடன் முறையே 15 மற்றும் 17-ஆம் இடங்களைப் பிடித்தனா். ஜோராவா் சிங் சந்து 116 புள்ளிகளுடன் 20-ஆம் இடம் பிடித்தாா்.
மகளிா் பிரிவு தகுதிச்சுற்றில் பிரகதி துபே 113 புள்ளிகளுடன் 7-ஆம் இடமும், பாவ்யா திரிபாதி 110 புள்ளிகளுடன் 13-ஆம் இடமும், நீரு 105 புள்ளிகளுடன் 19-ஆம் இடமும் பிடித்தனா். டிராப் பிரிவு தகுதிச்சுற்றில் முதல் 6 இடங்களைப் பிடிப்போருக்கே இறுதிச்சுற்றில் இடம் கிடைக்கும்.
6 பதக்கங்கள்: பதக்கப் பட்டியலில் இந்தியா 2 தங்கம், 3 வெள்ளி, 1 வெண்கலம் என 6 பதக்கங்களுடன் 3-ஆவது இடத்தில் நீடிக்கிறது. அமெரிக்கா 7 பதக்கங்களுடன் முதலிடத்திலும், சீனா 11 பதக்கங்களுடன் 2-ஆவது இடத்திலும் உள்ளன.
