வேங்கைவயல்: போராட்டம் நடத்த முயன்ற விசிக-வினர் கைது; போலீஸ் குவிப்பு; களநிலவரம் என்ன?

புதுக்கோட்டை மாவட்டம், இறையூர் வேங்கைவயல் கிராமத்தில் கடந்த 2022 ஆம் ஆண்டு டிசம்பர் 26 ஆம் தேதி பட்டியல் சமூக மக்கள் பயன்படுத்தும் மேல்நிலை நீர்த்தேக்க தொட்டியில் மனிதக் கழிவு கலக்கப்பட்டது. இந்த சம்பவம் நாடு முழுவதும் அதிர்ச்சியை ஏற்படுத்திய நிலையில், இதனைக் கண்டித்து பல்வேறு அரசியல் கட்சிகள் ஆர்ப்பாட்டம் நடத்தின. அதனால், இந்த சம்பவம் தொடர்பாக சி.பி.சி.ஐ.டி போலீஸார் விசாரணை நடத்தி வருகின்றனர். சம்பவம் குறித்து விசாரிக்க உயர் நீதிமன்ற ஓய்வுபெற்ற நீதிபதி எம். சத்தியநாராயணன் தலைமையில் ஒரு நபர் ஆணையத்தை அமைத்து உயர் நீதிமன்றம் உத்தரவிட்டது.

இந்த சம்பவம் நடைபெற்று மூன்றாண்டுகள் தொடங்கியும் இன்னும் குற்றப்பத்திரிக்கை கூட தாக்கல் செய்யப்படவில்லை என்று நீதிமன்றம் கண்டித்தது. இதற்கிடையில், 4-க்கும் மேற்பட்ட நபர்களிடம் விசாரணை, டி.என்.ஏ பரிசோதனை எனப் பல்வேறு வகைகளில் விசாரணை நடத்தப்பட்டது. அதோடு, பலரிடம் குரல் மாதிரி சோதனையும் மேற்கொள்ளப்பட்டது. இந்நிலையில், இந்த வழக்கில் மூன்று பேர்கள் ஈடுபட்டதாகப் புதுக்கோட்டை நீதிமன்றத்தில் குற்றப்பத்திரிகை தாக்கல் செய்திருப்பதாகத் தமிழக அரசு சார்பில் சென்னை உயர் நீதிமன்றத்தில் அரசு தரப்பு வழக்கறிஞர் தெரிவித்தார்.

இந்நிலையில், விடுதலைச் சிறுத்தைகள் கட்சித் தலைவர் தொல்.திருமாவளவன், பா.ஜ.க அண்ணாமலை, கம்யூனிஸ்ட் கட்சித் தலைவர்கள் உள்ளிட்டோர், ‘இந்த வழக்கு விசாரணையை சி.பி.ஐ-க்கு மாற்ற வேண்டும்’ என்று கோரிக்கை விடுத்துள்ளனர். இந்நிலையில், வேங்கைவயல் கிராமத்திலும், புதுக்கோட்டையிலும் விடுதலைச் சிறுத்தைகள் கட்சி சார்பில் போராட்டம் நடத்த இருப்பதாக அறிவிக்கப்பட, பாதுகாப்புக்காக ஏராளமான போலீஸார் குவிக்கப்பட்டனர்.

மற்றொருபுறம், ‘பாதிக்கப்பட்ட எங்களில் மூன்று பேரைக் குற்றவாளியாக்குவதா?’ என்று வேங்கைவயலைச் சேர்ந்த மக்கள் ஊரிலேயே அமர்ந்து உண்ணாவிரதம் போராட்டம் நடத்தினர். ஊருக்கு முகப்பிலேயே நிறுத்தப்பட்டிருந்த ஏராளமான போலீஸார், பேரிகாட் அமைத்து செய்தியாளர்களை உள்ளே அனுமதிக்காமல் தடுத்து நிறுத்தினர்.

இந்தச் சூழலில், வேங்கைவயலில் மக்கள் உள்ளிருப்பு உண்ணாநிலை அறப்போராட்டம் நடத்திக்கொண்டிருப்பதைப் பார்க்கச் சென்று மக்களைச் சந்தித்து ஆறுதல் கூறி திரும்பி வரும் வழியில் விடுதலைச் சிறுத்தைகள் கட்சியின் புதுக்கோட்டை வடக்கு மாவட்டச் செயலாளர் இளமதி அசோகன், மேற்கு மாவட்டச் செயலாளர் வெள்ளைநெஞ்சன், புதுக்கோட்டை நகரச் செயலாளர் அண்ணாதுரை, ஆலங்குடி தொகுதிச் செயலாளர் விஜயபாஸ்கர், குன்றாண்டார்கோவில் ஒன்றிய அமைப்பாளர் நந்தன், கணேசமூர்த்தி ஆகியோரை வேங்கைவயலுக்கும் பூங்குடிக்கும் அருகில் உள்ள பகுதியில் வைத்து கைது செய்தது காவல்துறை.

அதேபோல் வேங்கைவயலுக்குள் நுழைய முயன்ற சிறுத்தை சிவா உள்ளிட்ட இருவரை போலீஸார் கைது செய்தனர். இன்னொருபக்கம், புதுக்கோட்டையில் அம்பேத்கர் சிலையிடம் மனு கொடுக்கும் போராட்டம் நடத்த முயன்ற 35க்கும் மேற்பட்ட விடுதலைச் சிறுத்தைகள் கட்சியினரை போலீஸார் கைது செய்தனர்.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்... https://bit.ly/3PaAEiY

வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்... https://bit.ly/3PaAEiY