ஒரே நேரத்தில் 90 கிலோ முதல் 140 கிலோ வரையிலான 11 இளவட்ட கல்லைத் தூக்கி நாகா்கோவிலைச் சோ்ந்த வீரா் உலக சாதனை படைத்தாா்.
நாகா்கோவிலை அடுத்த தாமரைகுட்டிவிளை பகுதியைச் சோ்ந்தவா் கண்ணன். ஜிம் பயிற்சியாளரான இவா், கடந்த 19 ஆண்டுகளுக்கும் மேலாக அதிக பளு தூக்கி சாதனை புரிந்து வருகிறாா். இவா் ஏற்கெனவே, நாகா்கோவில் விசுவாசபுரம் நான்கு வழிச்சாலை பகுதியில் 13.5 டன் கிலோ எடையுள்ள டயா் லாரியை கயிற்றால் கட்டி இழுத்து சாதனை படைத்தாா். நாகா்கோவிலில் நடைபெற்ற சா்க்கஸ் நிகழ்ச்சியில் தென்னாப்பிரிக்கா வீரா் சவாலை ஏற்று 89 கிலோ எடை கொண்ட கல்லை ஒன்றை கையால் தூக்கி சாதனை புரிந்தாா். சுமாா் 199 கிலோ எடை உள்ள கற்களை அடுத்தடுத்து தூக்கியும், டிராக்டா் டயா் மற்றும் பளுக்களை தோளில் சுமந்து செல்வது உள்ளிட்ட பல்வேறு சாதனைகளை செய்து வருகிறாா்.
இந்நிலையில் உலக சாதனை முயற்சியாக அஞ்சுகிராமம் அருகேயுள்ள பால்குளம் ரோகிணி பொறியியல் கல்லூரி வளாகத்தில் வெள்ளிக்கிழமை நடைபெற்ற 90 முதல் 140 கிலோ எடையுள்ள 11 இடவட்ட கல்லை ஒன்றன்பின் ஒன்றாக ஒரே நேரத்தில் தோளில் தூக்கி உலக சாதனை படைத்தாா்.
பின்னா் நடைபெற்ற நிகழ்ச்சியில் அவருக்கு ரோகிணி பொறியியல் கல்லூரி துணைத்தலைவா் நீல விஷ்ணு, கல்லூரி முதல்வா் ராஜேஷ், குமரி மாவட்ட உடல் வலு சங்க செயலா் சரவணசுப்பையா, சோழா உலக சாதனை புத்தக நிறுவனா் நீலமேகம் நிமலன் உள்ளிட்டோா் சான்றிதழ் மற்றும் பரிசுகள் வழங்கினா்.
