5-ஆவது நாளாக முடங்கிய நாடாளுமன்றம்

புது தில்லி: அதானி விவகாரம் மற்றும் சம்பல் வன்முறை தொடா்பாக விவாதம் கோரி, நாடாளுமன்றத்தின் இரு அவைகளிலும் எதிா்க்கட்சிகள் திங்கள்கிழமையும் அமளியில் ஈடுபட்டன. இதனால், நாடாளுமன்ற இரு அவைகளும் நாள் முழுவதும் ஒத்திவைக்கப்பட்டன.

நாடாளுமன்ற குளிா்கால கூட்டத் தொடா் நவ. 25-ஆம் தேதி தொடங்கியதுமுதல் இந்த விவகாரங்களை எழுப்பி எதிா்க்கட்சி உறுப்பினா்கள் தொடா் அமளியில் ஈடுபட்டு வருகின்றனா். இதனால், இரு அவை அலுவல்களும் ஐந்தாவது நாளாக திங்கள்கிழமையும் முடங்கின.

மக்களவை ஒத்திவைப்பு: மக்களவை காலை 11 மணிக்கு கூடியபோது, அதானி உள்ளிட்ட விவகாரங்கள் மீது விவாதத்துக்கு அனுமதிக்க வலியுறுத்தி அவையின் மையப் பகுதியை முற்றுகையிட்டு எதிா்க்கட்சி உறுப்பினா்கள் முழக்கமிட்டனா்.

அப்போது, ‘கேள்வி நேரத்துக்குப் பிறகு இந்த விவகாரங்கள் விவாதத்துக்கு எடுத்துக்கொள்ளப்படும். எனவே, கேள்வி நேரத்தை அனுமதியுங்கள்’ என்று அவைத் தலைவா் ஓம் பிா்லா கேட்டுக்கொண்டாா். அதைப் பொருட்படுத்தாத எதிா்க்கட்சி உறுப்பினா்கள் தொடா் அமளியில் ஈடுபட்டனா். இதனால், அவையை பகல் 12 மணி வரை ஓம் பிா்லா ஒத்திவைத்தாா்.

அவை மீண்டும் பகல் 12 மணிக்கு கூடியபோதும் அதே நிலை நீடித்தது. எதிா்க்கட்சி உறுப்பினா்கள் சிலா் அவையின் மையப் பகுதியை முற்றுகையிட்டும் மற்றவா்கள் அவா்களின் இருக்கைப் பகுதியில் நின்றபடியும் முழக்கங்களை எழுப்பினா்.

இந்த அமளிக்கிடையே, கடலோர கப்பல் போக்குவரத்து மசோதா 2024-ஐ மத்திய துறைமுகங்கள், கப்பல் போக்குவரத்து மற்றும் நீா் வழித்தடங்கள் அமைச்சா் சா்வானந்த சோனோவால் அவையில் அறிமுகம் செய்தாா்.

அப்போது, அவை அலுவல்கள் நடைபெற அனுமதிக்குமாறு அமளியில் ஈடுபட்ட எதிா்க்கட்சி உறுப்பினா்களை அவையை அப்போது வழிநடத்திய பாஜக எம்.பி. சந்தியா ராய் கேட்டுக்கொண்டாா். அதைப் பொருட்படுத்தாமல் உறுப்பினா்கள் தொடா் அமளியில் ஈடுபட்டதால், அவை நடவடிக்கைகளை நாள் முழுவதம் சந்தியா ராய் ஒத்திவைத்தாா்.

மாநிலங்களவை ஒத்திவைப்பு: மாநிலங்களவை திங்கள்கிழமை கூடியதும், அதானி விவகாரம், சம்பல் வன்முறை, மணிப்பூா் நிலவரம் உள்ளிட்ட விவகாரங்களை எதிா்க்கட்சி உறுப்பினா்கள் எழுப்பினா். இதனால், தொடங்கிய சில நிமிஷங்களிலேயே அவை நடவடிக்கைகளை அவைத் தலைவா் ஜகதீப் தன்கா் ஒத்திவைத்தாா்.

அவை மீண்டும் பகல் 12 மணிக்கு கூடியபோது, எதிா்க்கட்சி உறுப்பினா்கள் மீண்டும் முழக்கங்களை எழுப்பி அமளியில் ஈடுபட்டனா். அப்போது, எதிா்க்கட்சி உறுப்பினா்களின் பேச்சுக்கள் எதுவும் அவைக் குறிப்பில் பதிவாகாது என்று குறிப்பிட்ட தன்கா், அவையில் கேள்வி நேரத்தை அனுமதித்தாா்.

அப்போது, எழுந்த திமுக எம்.பி. திருச்சி சிவா, சில விவகாரங்களை எழுப்பினாா். ஆனால், ‘உறுப்பினா்கள் அனைவரும் அவரவா் இருக்கைகளுக்குச் சென்று அவை ஒழுங்கை கடைப்பிடித்தால் மட்டுமே விவாதத்தை அனுமதிக்க முடியும்’ என்று தன்கா் கூறினாா்.

இருந்தபோதும், எதிா்க்கட்சி உறுப்பினா்கள் தொடா் அமளியில் ஈடுபட்டனா். இதனால், எந்தவித அலுவல்களும் நடைபெறாத நிலையில் அவையை நாள் முழுவதும் அவைத் தலைவா் தன்கா் ஒத்திவைத்தாா்.

முன்னதாக, அவையில் ஏற்கெனவே பட்டியலிடப்பட்ட அலுவல்கள் அனைத்தையும் ஒத்திவைத்துவிட்டு அதானி விவகாரம், சம்பல் வன்முறை, மணிப்பூா் நிலவரம் உள்ளிட்டவை குறித்து விவாதம் நடத்த அனுமதிக்க வலியுறுத்தி விதி எண் 267-இன் கீழ் எதிா்க்கட்சி உறுப்பினா்கள் 17 முன்னறிவிப்புகளை (நோட்டீஸ்) சமா்ப்பித்தனா். அந்த முன்னறிவிப்புகள்அனைத்தையும் நிராகரிப்பதாக அவைத் தலைவா் ஜகதீப் தன்கா் அறிவித்தாா். அதன் காரணமாக, குளிா்கால கூட்டத் தொடா் கடந்த நவ. 25-ஆம் தேதி தொடங்கியது முதல் அமளி காரணமாக எந்தவித அலுவல்களும் நடைபெறாமல் தொடா்ந்து ஒத்திவைக்கப்பட்டு வருவது குறிப்பிடத்தக்கது.