Ashwin: ``அவங்க அப்பா எல்லா மேட்ச்சும் பாக்க வருவார்" - அஷ்வின் குறித்து நெகிழும் TNCA பழனி

இந்திய அணியின் மிக முக்கிய வீரரான அஷ்வின் அனைத்து விதமான கிரிக்கெட்டிலிருந்தும் ஓய்வை அறிவித்திருக்கிறார். இந்நிலையில், அஷ்வினை சிறுவயதிலிருந்தே பார்த்து வரும் அவரது கிரிக்கெட் கரியரில் முக்கியப் பங்கும் ஆற்றிய தமிழ்நாடு கிரிக்கெட் அசோசியேஷனின் செயலாளர் R.I.பழனியிடம் அஷ்வின் குறித்துப் பேசினேன்.

அஷ்வினின் ஓய்வைப் பற்றி பேசிய அவர், ``அஷ்வினை சின்ன வயசுல இருந்தே பார்த்துட்டு இருக்கேன். அப்போவே அவருக்கு தன்னம்பிக்கை ரொம்ப அதிகம். அதேமாதிரி கிரிக்கெட் பற்றிய அறிவும் அதிகம். ஆரம்பத்துல பேட்ஸ்மேனாதான் ஆடிக்கிட்டு இருந்தாரு. அதுக்குப் பிறகுதான் பௌலரா ஆகுறாரு. U17 லெவல்ல பௌலரா கலக்கிட்டாரு. அதுக்குப்புறம் எதைப் பத்தியுமே யோசிக்கல. இந்தியாவுக்காக செலக்ட் ஆகி ரொம்ப சிறப்பா ஆடிட்டாரு. இதுவரைக்கும் இல்லாத வகையில நிறைய சாதனைகளை செஞ்சிட்டாரு. தமிழ்நாட்டுல இருந்து இந்தியாவுக்காக ஆடுன மிகச்சிறந்த கிரிக்கெட்டர் அவர்தான். அதுல எந்த சந்தேகமும் இல்ல. அஷ்வினோட அப்பா அம்மாவும் அவருக்கு ரொம்பவே சப்போர்ட்.

அஷ்வின் ஆடுற ஒரு மேட்ச் கூட அவங்க அப்பா நேர்ல பார்க்க மிஸ் பண்ண மாட்டாரு. இந்த சமயத்துல அவர் ரிட்டயர்ட் ஆனது அவரோட சொந்த முடிவு. அதுல நாம கருத்து சொல்ல முடியாது. லெவன்ல இடம் இல்லாம பென்ச்ல இருந்தது அவருக்கு கஷ்டமா இருந்துருக்கலாம். ஆனாலுமே, அவர் இன்னும் கொஞ்ச நாள் ஆடியிருக்கலாம்ங்றதுதான் எல்லாரோட எண்ணமும். நீங்க கூட பாருங்க சமீபத்துல சேப்பாக்கத்துல பங்களாதேஷ் கூட செஞ்சுரியும் போட்டு நிறைய விக்கெட்டும் எடுத்திருப்பாரு. நல்ல ஃபார்ம்லதான் இருந்தாரு. கண்டிப்பா இன்னும் கொஞ்ச நாளாச்சும் ஆடியிருக்க முடியும்.

அவரோட தனிப்பட்ட முடிவுங்றதுனால நாம எதுவுமே சொல்ல முடியாது. நாங்க கூட சமீபத்துலதான் அஷ்வினுக்காக அவர் 100 டெஸ்ட்ல ஆடுனதுக்காகவும் 500 விக்கெட் எடுத்ததுக்காகவும் பாராட்டு விழா எடுத்தோம். அதேமாதிரி இப்போவும் கூட பண்ணலாம். ஆனா, அஷ்வின் இன்னும் ஐ.பி.எல் ல ஆடிக்கிட்டுதான் இருக்குறாரு. அதனால அவர் ஒத்துக்கிட்டா தமிழ்நாடு கிரிக்கெட் சங்கம் சார்புல அவருக்கு பிரமாண்டமா விழா எடுக்கத் தயாரா இருக்கோம்.' என்றார்.

சமீபத்தில் தமிழ்நாடு கிரிக்கெட் சங்கத்தின் சார்பில் அஷ்வின் 100 நிகழ்வு ஏற்பாடு செய்யப்பட்டிருந்தது. அதில் பேசிய அஷ்வின் R.I.பழனி அவர்களையும் தன்னுடைய வளர்ச்சிக்கு உதவியவர் எனக் கூறி நன்றி சொல்லியிருந்தார் என்பது குறிப்பிடத்தக்கது.

அஷ்வினின் ஓய்வுப் பற்றிய உங்களின் கருத்துகளை கமென்ட் செய்யுங்கள்.