மத்திய அரசின் சார்பில், ஒவ்வோர் ஆண்டும் தேசிய அளவிலும் மாநில அளவிலும் வழங்கப்படும் மதிப்பிற்குரிய விருது சாகித்ய அகாதமி விருது (Sahitya Akademi Award). பரிசுத்தொகையாக 1,00,000 ரூபாயும், ஒரு பட்டயமும் வழங்கப்படும். நாட்டில் உள்ள 24 மொழிகளில் வெளியாகும் சிறந்த படைப்புகளைத் தேர்வு செய்து ஒவ்வொரு ஆண்டும் இந்த விருது வழங்கப்பட்டு வருகிறது. இந்த ஆண்டு சாகித்ய அகாதமி விருது பெறுபவர்களின் பெயர் பட்டியல் வெளியாகியிருக்கிறது. 1908-ம் ஆண்டு மார்ச் 13-ம் அன்று வ.உ.சி. கைது செய்யப்பட்டார்.
அதைத் தொடர்ந்து திருநெல்வேலியிலும் தூத்துக்குடியிலும் மக்கள் போராட்டம் வெடித்தது. அவர்கள் மீது நடத்தப்பட்ட அடக்குமுறையின் தொடர்ச்சியாக, மிகப்பெரிய எழுச்சி ஏற்பட்டது. இந்த எழுச்சி குறித்தும், அதன் விளைவுகளையும் விரிவாக ஆராயும் வகையில் பேராசிரியர், எழுத்தாளர் ஆ.இரா. வேங்கடாசலபதி எழுதிய `திருநெல்வேலி எழுச்சியும், வ.உ.சி.யும் 1908' என்ற புத்தகத்துக்கு சாகித்ய அகாதமி விருது அறிவிக்கப்பட்டிருக்கிறது.
மதுரை எம்.பி சு. வெங்கடேசன், ``சுதந்திரத்திற்கு முன்பு நடந்த எழுச்சிகளில் மிகவும் முக்கியமானது 1908-ல் நடந்த திருநெல்வேலி எழுச்சி. நெல்லையிலும் தூத்துக்குடியிலும் அப்போது ஏற்பட்ட மக்கள் எழுச்சியையும் அதன் தாக்கத்தையும் பல அரிதான தகவல்களுடன் எடுத்துச் சொல்லும் ஆய்வு நூல் 'திருநெல்வேலி எழுச்சியும் வ.உசி.யும் 1908'" எனப் பாராட்டியிருக்கிறார். பலத்துறையின் அறிஞர்களும் சாகித்ய அகாதமி விருது பெறும் பேராசிரியர், எழுத்தாளர் ஆ.இரா. வேங்கடாசலபதியைப் பாராட்டி பதிவிட்டு வருகின்றனர்.
