Ashwin: ``துப்பாக்கிய புடிங்க வாஷி!" - வாஷிங்டன் சுந்தருக்கு அஷ்வினின் ரீ-போஸ்ட்
Admin
- 6 hours ago
சர்வேதேச கிரிக்கெட்டில் ஃபார்மெட்டுகளையும் சேர்த்து மொத்தமாக 765 விக்கெட்டுகளை வீழ்த்தி, இந்தியாவுக்காக அதிக விக்கெட்டுகள் எடுத்தவர்கள் பட்டியலில் இரண்டாம் இடத்தில் இருக்கும் தமிழக வீரர் அஷ்வின் நேற்று முன்தினம் தனது ஓய்வை அறிவித்தார். அஷ்வின், 106 டெஸ்ட் போட்டிகளில் 537 விக்கெட்டுகள் வீழ்த்தி, டெஸ்ட் கிரிக்கெட்டில் அதிக தொடர் நாயகன் விருது வென்ற வீரர் என்ற சாதனையைத் தன்வசம் வைத்திருக்கிறார். டெஸ்ட் போட்டிகளில் அதிவேகமாக 500 விக்கெட்டுகளை வீழ்த்தியவர்களின் பட்டியலில் முத்தையா முரளிதரனுக்கு அடுத்தபடியாக அஷ்வின் இரண்டாவது இடத்தில் இருக்கிறார்.
இன்னும் பல சாதனைகளுக்குச் சொந்தக்காரரான அஷ்வின், நடப்பு பார்டர் கவாஸ்கர் தொடரில் பிளெயிங் லெவனில் இடம்பெறாத போட்டியின்போது திடீரென ஓய்வு பெற்றது, பலருக்கும் அதிர்ச்சியைத் தந்திருக்கிறது. மேலும், சிறப்பு நிகழ்ச்சி ஏற்பாடு செய்து அஷ்வினை முறையாக வழியனுப்பிவைக்க வேண்டும் என பி.சி.சி.ஐ-க்குப் பலரும் வலியுறுத்திவருகின்றனர். மறுபக்கம், அஷ்வினுடன் விளையாடிய வீரர்கள் தங்களுக்குள்ளான நினைவுகளைப் பகிர்ந்து வருகின்றனர்.
அந்த வரிசையில், தமிழகத்தைச் சேர்ந்த சக வீரர் வாஷிங்டன் சுந்தர், எக்ஸ் தளத்தில் அஷ்வினுடன் இருக்கும் புகைப்படத்தைப் பகிர்ந்து, ``ஒரு சக வீரர் என்பதைத் தாண்டி, நீங்கள் ஒரு இன்ஸ்பிரேஷன், வழிகாட்டி மற்றும் உண்மையான சாம்பியன். மைதானம், டிரெஸ்ஸிங் ரூமை உங்களுடன் பகிர்ந்ததில் பெருமை. ஒரே மாநிலத்திலிருந்து வந்து, சேப்பாக்கத்தின் ஒரு மூலையில் இருந்து உங்களைப் பார்த்தது முதல் உங்களுக்கெதிராவும், உங்களுடனும் விளையாடி வளர்ந்திருக்கிறேன்.
Thupakkiya pudinga washiii! The 2 minutes you spoke that night in the get together was the best
— Ashwin (@ashwinravi99) December 20, 2024
அந்த ஒவ்வொரு கணமும் எனக்குக் கிடைத்த பாக்கியம். களத்துக்குள்ளேயும், களத்துக்கு வெளியேயும் உங்களிடமிருந்து கற்றுக்கொண்டதை என்றென்றும் என்னுடன் கொண்டுசெல்வேன்." என்று பதிவிட்டிருக்கிறார்.
அதற்கு, எக்ஸ் தளத்திலேயே அஷ்வின் நடிகர் விஜய்யின் தி கோட் பட பாணியில், ``துப்பாக்கிய புடிங்க வாஷி (வாஷிங்க்டன் சுந்தர்)." என்று பதிலளித்திருக்கிறார். அஷ்வினின் கூற்றுப்படி இந்திய அணியில் அவரின் இடத்தை வாஷிங்க்டன் சுந்தரே நிரப்பும் பட்சத்தில் அது தமிழ்நாட்டுக்கும் பெருமையாக அமையும்.
நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...
