காய்ச்சல், கடுங்குளிர், அட்டைக்கடி! சந்திச்சதே இல்ல இப்படியொரு ஷூட்டிங்!- `சின்ன...
பொடுகுத் தொல்லையிலிருந்து விடுபட..?
பொடுகு, ஒரு வகையான பூஞ்சையால் ஏற்படுகிறது. சிலருக்கு அது வேகமாகவும், சிலருக்கு மெதுவாகவும் பரவும். சிலருக்கு என்ன செய்தாலும் நீங்காது. காரணம், அவர்கள் ஸ்கால்ப்பின் தன்மை. மரபுகூட அதற்குக் காரணமாக இருக்கலாம். பொடுகை எதிர்க்க ஆன்டி ஃபங்கல் ஷாம்பூ (anti-fungal shampoo) சிறந்தது. அவற்றில் உள்ள zinc/sulphur பொடுகை நீக்கவல்லவை.
இயற்கை முறையைப் பின்பற்ற நினைப்பவர்கள், முதல் நாள் இரவு ஊறவைத்த வெந்தயத்தை அடுத்த நாள் அரைத்து, தயிர் சேர்த்து, தலைக்குத் தேய்த்துக் குளித்தால் நல்ல பலன் கிடைக்கும். வெந்தயம், கறிவேப்பிலை, தேங்காய் எண்ணெய்க் கலவையையும் பயன்படுத்தலாம். 'பொடுகுத் தொல்லை இருக்கும்போது எண்ணெய் பயன்படுத்தலாமா?' என்று கேட்கலாம். சிலருக்கு ஸ்கால்ப் வறண்டு போயிருப்பதால்கூட பொடுகு ஏற்படலாம் என்பதால், அவர்கள் எண்ணெய் வைப்பது அவசியம். ஏற்கெனவே தலை எண்ணெய்ப்பசையாக இருப்பவர்கள் ஆன்டி டாண்ட்ரஃப் ஷாம்பூ (anti-dandruff shampoo) பயன்படுத்துவது சிறந்தது.
முடி உதிர்வதை எவ்வாறு தடுப்பது?
சராசரியாக ஒருவருக்கு ஒரு நாளைக்கு 50 முதல் 100 முடிகள்வரை உதிர்வது இயல்புதான். புதிய முடிகள் முளைக்கும். முடி வளர்ச்சி சுழற்சியை மூன்று நிலைகளாகப் பிரிக்கலாம். சிலருக்கு, முடி முளைக்கும் முதல் நிலையிலிருந்து, முடி வளரும் இரண்டாவது நிலை விரைவாகக் கடக்கப்பட்டு, முடி உதிரும் இறுதிநிலைக்கு விரைவாகத் தள்ளப்படுவதால், முடி சீக்கிரமாக உதிரலாம். உடல்நிலைக் காரணம், ஊட்டச்சத்துக் குறைபாடு, மனஅழுத்தம் போன்றவை அதற்குக் காரணங்களாக இருக்கலாம். உங்களுக்கான காரணத்தைக் கண்டறிந்து அதைச் சரிசெய்ய வேண்டும். தலைக்கு எண்ணெய் வைத்து ரத்த ஓட்டத்தைத் தூண்டும் வகையில் மசாஜ் செய்வது, ஊட்டச்சத்து நிறைந்த காய்கறிகள், கீரை வகைகள், மற்றும் முடியின் ஆரோக்கியத்துக்கு அவசியமான இரும்புச் சத்து, புரதம், கால்சியம் ஆகியவற்றைச் சேர்த்துக்கொள்வது என முயலலாம்.
இளநரைப் பிரச்னைக்கு..?
இதற்கு உணவில் போதுமான ஊட்டச்சத்து இல்லாததே காரணம். நிறமி உற்பத்திக்கு பி காம்ப்ளெக்ஸ் வைட்டமின்கள் அவசியம். பி வைட்டமின்கள் குறைவாக உள்ள உணவுமுறையால் மெலனின் உற்பத்தி குறைந்து கேசம் நரைக்கிறது. ஊட்டச்சத்துள்ள உணவுகளைச் சாப்பிடுதல், கேசத்துக்கு எண்ணெய் மசாஜ் செய்தல், பேக் போடுதல் என முயலலாம். ஹேர் கலரிங் பண்ணும்போது அமோனியா ஃப்ரீ ஹேர் கலரை உபயோகிப்பது நல்லது. ஹெர்பல் ஹேர் கலர் பயன்படுத்துவது சிறப்பு.
வீட்டிலேயே ஹேர் ஸ்ட்ரெயிட்டனிங் செய்யலாமா?
செய்யக்கூடாது. அதில் பல தவறுகள் ஏற்பட வாய்ப்புள்ளது. கேசத்தின் வகை, அதற்கேற்ப ஸ்ட்ரெயிட்டனிங் முறை என, இதற்கு புரொஃபஷனல் சர்வீஸ் தேவை. வீட்டில் சுயமாக செய்துகொள்வது கேச பாதிப்புக்கு வழிவகுக்கும்.
முடி வறட்சி, பிளவை எப்படிக் கையாள வேண்டும்?
கேச வறட்சிக்கு மரபு, சுருட்டை முடி எனப் பல காரணங்கள் இருக்கலாம். ஊட்டச்சத்துக் குறைபாடு காரணத்தால், அந்த வறண்ட கேசத்தில் நுனிப்பிளவு ஏற்படலாம். அந்தப் பிளவுகளை நீக்குவதற்கு எனப் பிரத்யேகக் கருவிகள் உள்ளன. அவற்றின் மூலம் பிளவை மட்டும் எடுக்கலாம். வறட்சி இருப்பவர்கள் கண்டிஷனர் உபயோகித்தால், இந்தப் பிளவு மேலும் வராமல் தடுக்கலாம்.
Vikatan Play
நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...
