ISRO Chairman: குடும்பக் கஷ்டம்; அரசுப்பள்ளியில் தமிழ்வழிப் படிப்பு - நெகிழும் இஸ்ரோ தலைவர் நாராயணன்

இஸ்ரோவின் புதிய தலைவராக தமிழகத்தைச் சேர்ந்த வி.நாராயணன் என்பவர் தேர்வு செய்யப்பட்டிருக்கிறார். தற்போதைய சேர்மனாக இருக்கும் சோம்நாத்தின் பதவிக்காலம் முடிவடையவிருக்கும் நிலையில் ஜனவரி 14 ஆம் தேதி நாராயணன் புதிய தலைவராகப் பொறுப்பேற்கிறார். உயரிய பதவியை எட்டியிருக்கும் நாராயணன் அவர்களைத் தொடர்புகொண்டு பேசினோம். 'அரசுப்பள்ளியில் தமிழ்வழியில்தான் படித்தேன்...' என தனது எளிய பின்னணியை விளக்கி நெகிழ்ச்சியாகப் பேசினார்.

வி.நாராயணன் பேசுகையில், ''இது ஒரு மிகப்பெரிய பொறுப்பு. அதற்கு பிரதம மந்திரி என்னை தேர்ந்தெடுத்ததில் மகிழ்ச்சி கொள்கிறேன். 41 ஆண்டுகளாக இஸ்ரோவில் பணியாற்றி வருகிறேன். பல்வேறு திட்டங்களின் இயக்குநராக 7 ஆண்டுகள் பணியாற்றியிருக்கிறேன். அந்த அனுபவங்களினால் எனக்கு இப்போது கிடைத்திருக்கும் இந்தப் பதவியை ஒரு மாபெரும் பொறுப்பாகத்தான் கருதுகிறேன். இந்தியாவை வளர்ச்சியடைந்த நாடாக மாற்ற விண்வெளித் துறையால் என்னவெல்லாம் செய்ய முடியுமோ அதை இஸ்ரோ மூலம் செய்வேன்.

கன்னியாகுமரியின் மேலக்காட்டுவிளை எனும் சிறு கிராமத்தில் எளிய குடும்பத்தில்தான் பிறந்து வளர்ந்தேன். அப்பா விவசாயத்தோடு ஊருக்குள்ளேயே சிறுதொழில்கள் சிலவற்றையும் செய்து வந்தார். அரசுப்பள்ளியில் தமிழ்வழிக்கல்வியில்தான் பயின்றேன். குடும்பக் கஷ்டங்கள் ஒருபுறம் இருந்தாலும் ஆசிரியர்களின் உதவியோடும் அவர்களின் ஆசிர்வாதத்தோடும்தான் கடினமாக படித்து இந்த நிலையை எட்டியிருக்கிறேன்." என்றார்.

1984 லிலிருந்து இஸ்ரோவில் பணியாற்றி வரும் வி.நாராயணன் ராக்கெட் மற்றும் விண்கல உந்துவிசை அமைப்புகளில் நிபுணத்துவம் பெற்றவர்.