Tirupati stampede: `இந்தத் துயரச் சம்பவம்...' - திருப்பதி நெரிசல் குறித்து ஆந்திர முதல்வரின் பதிவு

வைகுண்ட ஏகாதசியை முன்னிட்டு, திருப்பதி ஏழுமலையான் கோயிலில் 10-ம் தேதி முதல் 19-ம் தேதிவரை சொர்க்கவாசல் திறக்கப்படும் என அறிவிக்கப்பட்டது. இந்த 10 நாள்களிலும் பக்தர்களுக்கு அனுமதி வழங்கப்பட்டது. அதைத் தொடர்ந்து முதல் மூன்று நாள்களுக்கான 1,20,000 இலவச தரிசன டிக்கெட் இன்று அதிகாலை 5 மணிக்கு வழங்கப்படும் என தேவஸ்தானம் அறிவித்திருந்தது.

அதற்காக 94 கவுன்ட்டர்களையும் ஏற்பாடு செய்ததாகக் கூறப்படுகிறது. இந்த நிலையில், நேற்று காலை முதலே டிக்கெட் கவுன்ட்டர்களில் கூட்டம் கூடத் தொடங்கியது.

இந்தக் கூட்ட நெரிசலில் தமிழ்நாட்டைச் சேர்ந்த பெண் பக்தர் மல்லிகா உட்பட 6 பேர் உயிரிழந்திருக்கின்றனர். பலர் காயமடைந்திருக்கின்றனர்.

இந்த விவகாரம் தொடர்பாக ஆந்திர முதல்வர் சந்திரபாபு நாயுடு தன் எக்ஸ் பக்கத்தில், ``திருமலை ஸ்ரீவாரி வைகுண்ட துவாராவைத் தரிசிக்க இலவச டோக்கன்களுக்காக, திருப்பதியில் உள்ள விஷ்ணு நிவாசம் அருகே ஏற்பட்ட கூட்ட நெரிசலில் சிக்கி பல பக்தர்கள் இறந்தது, என்னை அதிர்ச்சிக்குள்ளாக்கியுள்ளது. டோக்கன்களுக்காக பக்தர்கள் அதிகளவில் கூடியிருந்த நேரத்தில் நடந்த இந்தத் துயரச் சம்பவம், என்னை மிகவும் பாதித்திருக்கிறது.

அவர்களில் சிலரின் நிலைமை மோசமாக இருப்பதாகத் தகவல் கிடைத்ததை அடுத்து, உயர் அதிகாரிகளை சம்பவ இடத்திற்குச் சென்று நிவாரண நடவடிக்கைகளை மேற்கொள்ளுமாறும், காயமடைந்தவர்களுக்கு சிறந்த மருத்துவ சிகிச்சை அளித்து அவர்களின் உயிரைக் காப்பாற்றவும் உத்தரவிட்டுள்ளேன். நான் அவ்வப்போது மாவட்ட ஆட்சியர், தேவஸ்தான அதிகாரிகளுடன் பேசி, நிலைமையை கவனித்து வருகிறேன்." எனக் குறிப்பிட்டிருக்கிறார்.

திருப்பதி நெரிசலின்போது என்ன நடந்தது என்பது குறித்து, வெளியான செய்தியில், திருமலை திருப்பதி தேவஸ்தானம் (TTD), ஜனவரி 9 அன்று வைகுண்ட ஏகாதசி விழாவிற்கான தரிசன டோக்கன்களை விநியோகிக்க சிறப்பு கவுண்டர்களை அமைத்திருந்தது. இந்த டோக்கன்கள், விஷ்ணு நிவாசம் கோயிலுக்கு அருகிலுள்ள பைரகிபட்டேடாவில் உள்ள MGM உயர்நிலைப் பள்ளியில் வழங்கப்பட்டன. புதன்கிழமை காலை முதல் ஆயிரக்கணக்கான பக்தர்கள் கவுன்ட்டர்களில் வரிசையில் நிற்கத் தொடங்கினர்.

ஆனால், மாலையில், கூட்டம் அதிகமாகி தள்ளுமுள்ளு ஏற்பட்டு கட்டுக்கடங்காமல் சென்றதாகக் கூறப்படுகிறது. அப்போது ஒரு பெண் உடல்நிலை சரியில்லாமல் மயக்கமடைய, அவரை மீட்பதற்காக ஒரு கதவு மட்டும் திறக்கப்பட்டபோது, கூட்டம் ஒரே நேரத்தில் முன்னோக்கிச் சென்றதால் நெரிசல் ஏற்பட்டு, உயிரிழப்பும் ஏற்பட்டிருக்கிறது. இந்தக் குழப்பமான சூழலுக்காக தேவஸ்தான வாரிய உறுப்பினர் பானு பிரகாஷ் பக்தர்களிடம் மன்னிப்பு கேட்டிருக்கிறார்.