Waqf: "இன்றைய நிலவரப்படி, 8.72 லட்சம் வக்பு சொத்துக்கள் இருக்கின்றன" - ராஜ்ய சபாவில் கிரண் ரிஜிஜூ

எதிர்க்கட்சிகளின் பல்வேறு எதிர்ப்புகளுக்கு மத்தியில், வக்பு திருத்த மசோதா 2025-ஐ (Waqf Amendment Bill 2025) நாடாளுமன்ற மக்களவையில் மத்திய சிறுபான்மையினர் நலத்துறை அமைச்சர் கிரண் ரிஜிஜு நேற்று (ஏப்ரல் 2) தாக்கல் செய்தார்.

12 மணிநேரம் நீடித்த விவாதத்தில், பிரதான எதிர்க்கட்சியான காங்கிரஸ் உள்ளிட்ட எதிர்க்கட்சிகளிலிருந்து 232 எம்.பி-க்கள் இந்தத் திருத்த மசோதாவுக்கு எதிராக வாக்களித்தனர்.

இருப்பினும், பா.ஜ.க தலைமையிலான தேசிய ஜனநாயகக் கூட்டணியின் 288 எம்.பி-க்களின் ஆதரவுடன் திருத்த மசோதா நிறைவேற்றப்பட்டது. இந்த நிலையில், அமைச்சர் கிரண் ரிஜிஜு நாடாளுமன்ற மாநிலங்களவையில் வக்பு திருத்த மசோதாவை இன்று (ஏப்ரல் 3) தாக்கல் செய்தார்.

அப்போது உரையாற்றிய கிரண் ரிஜிஜு, ``இந்த மசோதாவை நாடாளுமன்றத்தில் தாக்கல் செய்வதற்கு முன்பு, மாநில அரசுகள், சிறுபான்மை ஆணையங்கள், வக்பு வாரியங்களுடன் ஆலோசனை நடத்தினோம்.

பின்னர், மக்களவை, மாநிலங்களவை பிரதிநிதிகள் அடங்கிய நாடாளுமன்ற கூட்டுக் குழு (JPC) அமைத்தோம். அதன் பிறகு, JPC மீது பலர் சந்தேகம் எழுப்பினாலும், நேற்று மக்களவையில் மசோதா நிறைவேற்றப்பட்டது.

இன்றைய நிலவரப்படி, 8.72 லட்சம் வக்பு சொத்துக்கள் இருக்கின்றன. 2006-ல் 4.9 லட்ச வக்பு சொத்துக்களின் வருமானம் ரூ. 12,000 கோடி என்று சச்சார் கமிட்டி மதிப்பிட்டிருந்தால், இன்றைய சொத்துக்களின் வருமானத்தை நீங்களே கணக்கிட்டுப் பாருங்கள்.

இந்த மசோதா மீதான விவாதத்தின் மூலம் ஒன்று மட்டும் தெளிவாகிறது, வக்பு வாரியத்துக்குச் சொந்தமான கோடிக்கணக்கான மதிப்புள்ள சொத்துகள் சட்டவிரோதமாக ஆக்கிரமிக்கப்பட்டுள்ளன.

வக்ஃப் வாரியத்தில் நடக்கும் முறைகேடுகளைப் போக்கவே இந்த மசோதா கொண்டு வரப்பட்டுள்ளது. எனவே, இதில் யாரும் சந்தேகப்பட வேண்டாம். சில அரசியல் கட்சிகள் தங்களின் வாக்கு வங்கிக்காகப் பொய்களைப் பரப்புகின்றன.

வக்பு சொத்துக்கள் அனைத்தும் முஸ்லிம்களுக்கானது என்று மத்திய உள்துறை அமைச்சர் தெளிவுபடுத்திவிட்டார். இந்த மசோதாவில் மேல்முறையீடு செய்வதற்கான உரிமையும் இருக்கிறது.

ஒருவருக்கான உரிமை தீர்ப்பாயத்தின் மூலம் கிடைக்கவில்லையென்றால், அவர் இந்த விதியின் மூலம் நீதிமன்றத்தில் மேல்முறையீடு செய்யலாம்.

இந்தத் திருத்த மசோதாவானது, `ஒருங்கிணைந்த வக்பு மேலாண்மை, அதிகாரம் அளித்தல் திறன் மற்றும் மேம்பாடு (UMEED - Unified Waqf Management Empowerment Efficiency and Development)' என்று பெயர் மாற்றம் செய்யப்படும்" என்று கூறினார்.

இதே உரையின்போது கிரண் ரிஜிஜூ, ``2014 பொதுத் தேர்தலுக்கு முன்னதாக மாதிரி நடத்தை விதிகளை அமல்படுத்துவதற்கு முன்பாக, 2014 மார்ச் 5-ம் தேதியன்று அப்போதைய ஐக்கிய முற்போக்கு கூட்டணி (UPA) அரசு, 123 பிரதான சொத்துக்களை மறுமதிப்பீடு செய்து டெல்லி வக்பு வாரியத்திடம் ஒப்படைத்தது. இந்த சொத்துக்கள் வீட்டுவசதி மற்றும் நகர்ப்புற விவகார அமைச்சகத்திற்குச் சொந்தமானவை" என்று கூறினார் குறிப்பிடத்தக்கது.