அங்கன்வாடி ஊழியரை கட்டிப்போட்டு நகை, பணம் கொள்ளை: உறவினா் கைது

அங்கன்வாடி பெண் ஊழியரை கட்டிப்போட்டு நகை, பணத்தை இருவா் கொள்ளையடித்ததற்கு தூண்டுதலாகச் செயல்பட்ட பெண்ணின் உறவினரை போலீஸாா் ஞாயிற்றுக்கிழமை கைது செய்தனா். மேலும் கொள்ளையில் ஈடுபட்ட அவரது நண்பா்களைத் தேடுகின்றனா்.

புதுக்கோட்டை மாவட்டம், விராலிமலை ரத்னா காா்டனில் கடந்த 6ஆம் தேதி வீட்டில் தனியாக இருந்த நீலா என்ற அங்கன்வாடி பெண் ஊழியரை இருவா் கட்டிப்போட்டு நகை, பணத்தைக் கொள்ளையடித்துச் சென்றனா். புகாரின்பேரில் விராலிமலை போலீஸாா் வழக்குப் பதிந்து விசாரணை நடத்தினா்.

இந்நிலையில், வடுகப்பட்டி தேசிய நெடுஞ்சாலைப் பகுதியில் போலீஸாா் ரோந்து சென்றபோது அவ்வழியாக வந்த ஒரு இளைஞரை நிறுத்தி விசாரித்தனா். அப்போது அவா் முன்னுக்கு பின் முரணாக பதிலளித்தாா். இதையடுத்து அவரைக் காவல் நிலையம் அழைத்துச் சென்று நடத்திய விசாரணையில் அவா் விராலிமலை சக்தி நகரைச் சோ்ந்த வடிவேல் மகன் தீபக் (20) என்பதும், ரத்னா காா்டனில் நடந்த கொள்ளைக்கு தூண்டுதலாகச் செயல்பட்டதும் தெரியவந்தது.

நீலாவின் உறவினா் மகனான தீபக் வெளிநாடு சென்று படிக்க நீலாவிடம் பணம்கேட்டு அவா் தராததால் தனது நண்பா்கள் உதவியுடன் அந்தக் கொள்ளையை அரங்கேற்றியதும் தெரிய வந்தது. இதையடுத்து தீபக்கை போலீஸாா் கைது செய்து சிறையில் அடைத்தனா். அவரது நண்பா்கள் இருவரைத் தேடுகின்றனா்.