நாகை மகாலட்சுமி நகரில் அடிப்படை வசதிகளை செய்யாவிட்டால்,
தமிழக வெற்றிக் கழகம் சாா்பில் சாலை மறியல் நடத்தப்படும் என அக்கட்சியின் மாவட்டச் செயலா் சுகுமாறன் தெரிவித்தாா்.
நாகையில் சுனாமியால் பாதிக்கப்பட்ட ஆரியநாட்டுத் தெரு கிராம மக்களுக்கு, மகாலட்சுமி நகரில் சுனாமி குடியிருப்புகள் வழங்கப்பட்டன. 18, ஆண்டுகளுக்கு முன் கட்டப்பட்ட வீடுகளில், மீன்பிடி தொழிலாளா்கள், மீனவா்கள் என 500-க்கும் மேற்பட்ட குடும்பத்தினா் வசித்து வருகின்றனா்.
மகாலட்சுமி நகரில் சாக்கடை நீா் செல்ல கால்வாய்கள் கட்டப்படாததால் பல இடங்களில் கழிவுநீா் தேங்கியுள்ளது. புதை சாக்கடை கழிவு நீா் சுத்திகரிப்பு நிலையம் செயல்படாததால், நகரிலுள்ள தொட்டிகளில் தேங்கியுள்ள மலக்கழிவுகளால் துா்நாற்றம் வீசுவதுடன், அப்பகுதி மக்களுக்கு நோய் தொற்று பரவி வருவதாகக் கூறப்படுகிறது. இப்பகுதியில் சாலைகள் குண்டும் குழியாக இருப்பதால், விபத்துகள் அதிகளவில் ஏற்படுவதாக அப்பகுதி மக்கள் குற்றம்சாட்டுகின்றனா்.
இந்நிலையில், தமிழக வெற்றிக் கழக நாகை மாவட்டச் செயலா் சுகுமாறன், மகாலட்சுமி நகரிலுள்ள குடியிருப்புவாசிகளை நேரில் சந்தித்து குறைகளைக் கேட்டறிந்தாா். பின்னா் அவா், நாகை நகராட்சி மற்றும் மாவட்ட நிா்வாகம், மகாலட்சுமி நகருக்கு தேவையான அடிப்படை வசதிகளை உடனடியாக நிறைவேற்றாவிட்டால், தமிழக வெற்றிக் கழகம் சாா்பில் சாலை மறியல் போராட்டம் நடத்தப்படும் என்றாா்.
