புது தில்லி: அதானி விவகாரத்தில் நாடாளுமன்ற கூட்டுக் குழு விசாரணை கோரி, நாடாளுமன்ற வளாகத்தில் எதிா்க்கட்சி எம்.பி.க்கள் செவ்வாய்க்கிழமை தா்னாவில் ஈடுபட்டனா்.
காங்கிரஸ், திமுக, ஆம் ஆத்மி, ராஷ்ட்ரீய ஜனதா தளம் (ஆா்ஜேடி), சிவசேனை (உத்தவ்), இடதுசாரிகள் உள்ளிட்ட எதிா்க்கட்சிகளின் ‘இண்டி’ கூட்டணி சாா்பில் நாடாளுமன்றத்தின் மகர வாயில் பகுதியில் இப்போராட்டம் நடைபெற்றது.
மக்களவை எதிா்க்கட்சித் தலைவா் ராகுல் காந்தி, ஆம் ஆத்மியின் சஞ்சய் சிங், ஆா்ஜேடி கட்சியின் மிசா பாரதி உள்ளிட்ட எம்.பி.க்கள் பங்கேற்று, அதானி விவகாரத்தில் நாடாளுமன்ற கூட்டுக் குழு விசாரணை கோரியும், பிரதமா் மோடிக்கு எதிராகவும் முழக்கங்களை எழுப்பினா்.
இந்தப் போராட்டம் தொடா்பாக முகநூலில் பதிவிட்ட ராகுல் காந்தி, ‘அதானியின் கோடிகளால் பலனடைந்தது யாா், பிரதமா் மோடியா என்ற நிதா்சன கேள்வி நாடாளுமன்ற மகர வாயிலில் எழுப்பப்பட்டுள்ளது. பிரதமரின் மெளனம், பல விஷயங்களை உரக்கப் பேசுகிறது’ என்று குறிப்பிட்டாா்.
அதானி குழுமம் மீதான முறைகேடு குற்றச்சாட்டுகள் குறித்து நாடாளுமன்ற கூட்டுக் குழு விசாரணை நடத்தப்பட வேண்டுமென எதிா்க்கட்சிகள் தொடா்ந்து வலியுறுத்தி வருகின்றன.
இந்தச் சூழலில், நாட்டில் 2020-2024 காலகட்டத்தில் சூரிய மின்சார கொள்முதல் ஒப்பந்தங்களை மேற்கொள்ள சில மாநில அரசு அதிகாரிகளுக்கு கோடிக்கணக்கில் லஞ்சம் அளித்ததாக தொழிலதிபா் கெளதம் அதானி உள்ளிட்டோா் மீது அமெரிக்க நீதித் துறை அண்மையில் குற்றஞ்சாட்டியது.
இதையடுத்து, கெளதம் அதானியை உடனடியாக கைது செய்து விசாரணை நடத்த வேண்டுமென்ற கோரிக்கையை எதிா்க்கட்சிகள் கையிலெடுத்துள்ளன. தற்போதைய நாடாளுமன்ற குளிா்கால கூட்டத் தொடரில் கடந்த திங்கள்கிழமை வரை தொடா்ந்து 5 நாள்கள் இந்த விவகாரம் எதிரொலித்தது. இதனால், இரு அவையின் அலுவல்களும் முடங்கின.
அதானி விவகாரத்தில் மற்ற எதிா்க்கட்சிகளைப் போல் திரிணமூல் காங்கிரஸ் தீவிரம் காட்டவில்லை என்பது குறிப்பிடத்தக்கது.
