அந்த வீடியோவால வெளியில தலைகாட்ட முடியல - சீரியல் நடிகர் துரைமணி

சன் டிவியில் 'மருமகள்' ஜீ தமிழ் சேனலில் 'வள்ளியின் வேலன்' ஆகிய சீரியல்களில் நடித்து வருபவர் துரைமணி. விஜய் டிவியில் 'பாவம் கணேசன்' தொடரிலும் நடித்திருந்தார். நடிப்பு தவிர, சீரியலுக்கு எடிட்டிங் ஸ்டூடியோ, டான்ஸ் ஸ்கூல் ஆகியவற்றையும் நிர்வகித்து வருகிறார்.

இந்நிலையில் சில தினங்களுக்கு முன் சில யூடியூப் சேனல்களில் இவரது டான்ஸ் ஸ்டூடியோவை நிர்வகித்து வரும் பெண் இவருடன் இருக்கும் போட்டோவைப் போட்டு 'துரைமணியின் ரியல் மனைவி இவங்கதான்' என வீடியோ வெளியாக, நொந்து போனவராக நம்மிடம் பேசினார்.

''இதுக்கு முன்னாடி நானே நிறைய வீடியோக்களைப் பார்த்திருக்கேன். சீரியல் ஆர்ட்டிஸ்டுகளைக் குறிப்பிட்டு இவங்க ரியல் ஜோடின்னு போடுவாங்க. ஆனா அந்தத் தகவல் உண்மையா இருக்கிறப்ப யாருக்கும் எந்தப் பிரச்னையும் இல்லை. ஆனா ரெண்டு நாள் முன்னாடி என் ஃபோனுக்கே நண்பர்கள் சிலர் ஒரு வீடியோவை அனுப்பி வச்சாங்க. பார்த்தா பயங்கர ஷாக்.

நான் விருகம்பாக்கத்துல ஸ்டூடியோவையும் வடசென்னை பகுதியில் டான்ஸ் ஸ்கூலும் வச்சிருக்கேன். டான்ஸ் ஸ்கூலை கவனிச்சிட்டிருக்கிறவங்க பள்ளி நாட்கள்ல இருந்து என்னுடன் ஒண்ணாப் படிச்ச தோழி. அவங்களுக்கு கல்யாணமாகி காலேஜ் போகிற மகள் இருக்காங்க. டான்ஸ் அகாடமியில் ஃபங்ஷன் ஏதாவது இருந்தா அப்ப எல்லாரும் சேர்ந்து ஃபோட்டோ எடுத்திருப்போமில்லையா, அப்படி அவங்க என் பக்கத்துல இருக்கிற மாதிரி போட்டோ என் சமூக வலைதளப் பக்கத்துல இருந்திருக்கு.

அந்தப் போட்டோவை எடுத்து 'இவரு மனைவி இவங்கதான்'னு வீடியோ வெளியிட்டிருக்காங்க. இதுல என்ன பெரிய கொடுமைன்னா எனக்கு இன்னும் திருமணமே ஆகலை. என் சொந்தக்காரங்க சிலர் இந்த வீடியோக்களைப் பார்த்துட்டு 'ஓஹோ சென்னையில கல்யாணமே பண்ணிட்டியா'னு கேக்கறாங்க. தொடர்ந்து துக்கம் விசாரிக்கிற மாதிரி வர்ற போன் கால்களால் சொந்த ஊர்ப்பக்கம் தலைகாட்டவே முடியலை.

இன்னொருபுறம் என்னுடைய தோழியான அவங்க நிலைமையை யோசிச்சுப் பாருங்க. அவங்க கணவர், குடும்பத்தினர் கண்ணுல இந்த வீடியோ பட்டா அவங்க மனசு என்ன பாடுபடும்? ரெண்டு நாளா அவங்களுமே பெரிய மனக் கஷ்டத்துல இருக்காங்க. தொடர்ந்து அவங்க என் டான்ஸ் ஸ்கூலை கவனிச்சிக்கிடுவாங்களானே இப்ப கேள்விக்குறியா இருக்கு.

என் வேலையை விடுங்க, அவங்களைப் பத்தி நாலு பேர் என்ன நினைப்பாங்க?

ஏதோவொரு யூடியூப்னு நான் கூட கடந்து போயிடுவேன். ஆனா அவங்க மீடியா தொடர்பில்லாத ஆள்ங்கிறதால அவங்களுக்கு இது பெரிய பிரச்னையா ஆகி குடும்பத்துல சிக்கலை உண்டாக்கிடுமோனு பயமா இருக்கு.

ஒரு சேனல் வீடியோ இந்த மாதிரி ஒரு வீடியோ போட்டா அதையே எடுத்துப் பலரும் நியூஸ் ஆக்கிடுறாங்க.

உங்க மூலமா இது முழுக்க முழுக்க தவறான தகவல்னு சொல்லிக்க விரும்புறேன். என்னுடைய இந்த தகவலைப் பார்த்துட்டு போட்ட வீடியோக்களை டெலீட் செய்துட்டாங்கன்னா பிரச்னை முடிஞ்சதுன்னு விட்டுடுவேன். அதையும் மீறி வீடியோ இருந்துச்சுன்னா சட்ட நடவடிக்கைதான் எடுக்கணும்'' என்கிறார் இவர்.