அரசு நலத்திட்டங்கள்: பெண்களிடம் லஞ்சம் வாங்கிய `சமூக நல அலுவலர்'... வைரல் வீடியோவால் பரபரப்பு!

பெண்கள், குழந்தைகள், மூத்த குடிமக்கள், வறிய நிலை மக்கள் மற்றும் மூன்றாம் பாலினத்தவர்களின் நலனை உறுதி செய்யும் வகையில் பல்வேறுத் திட்டங்களை, தமிழ்நாடு அரசின் சமூக நலன் மற்றும் மகளிர் உரிமைத் துறை செய்து வருகிறது.

குறிப்பாக, பெண்கள் மற்றும் பெண் குழந்தைகள் பயனடையும் வகையில், முதலமைச்சரின் பெண் குழந்தைகள் பாதுகாப்புத் திட்டம், மகளிர் உரிமைத்தொகை, தொட்டில் குழந்தைத் திட்டம், குழந்தை தத்தெடுப்பு, திருமண நிதி உதவித் திட்டம், இலவச தையல் இயந்திரம் வழங்கும் திட்டம், அரசு சேவை இல்லங்கள் மற்றும் பணிபுரியும் மகளிர் விடுதிகள் போன்ற திட்டங்கள் மூலம் பெண்களின் பாதுகாப்பு மற்றும் நலனை மேம்படுத்துகிறது.

இந்த திட்டங்கள், அந்தந்த மாவட்டங்களில் உள்ள சமுக நலத்துறை அலுவலகங்கள் மற்றும் வட்டார வளர்ச்சி அலுவலகங்கள் வாயிலாக மேற்கொள்ளப்படுகின்றன.

இந்தநிலையில், விருதுநகர் மாவட்டம் ராஜபாளையத்தில் அரசு நலத்திட்டங்களை பயனாளிகளுக்கு செய்து கொடுப்பதற்கு லஞ்சம் வாங்குவதாக வெளியான வீடியோ பெரும் பரபரப்பை ஏற்படுத்தியுள்ளது.

சமூக நல விரிவாக்க அலுவலரின் இந்த செயலை கண்டித்து பலரும் கருத்துகளை தெரிவித்து வருகின்றனர். இதுகுறித்து மாவட்ட சமூக நலத்துறை அலுவலர் ஷீலாசுந்தரியிடம் விளக்கம் கேட்டு பேசினோம். அப்போது அவர், "ராஜபாளையம் வட்டார வளர்ச்சி அலுவலகத்தில் சமூக நலத்துறை அலுவலகம் செயல்பட்டு வருகிறது.

இங்கு சமூக நலத்துறை விரிவாக்க அலுவலராக மேக்தா மேரி என்பவர் பணியாற்றி வருகிறார். தமிழக அரசு பெண்கள் மற்றும் பெண் குழந்தைகள் நலனுக்காக செயல்படுத்தும் திட்டங்களை பயனாளிகளுக்கு செய்து கொடுப்பதற்கு லஞ்சம் வாங்கியதாக கடந்த சில நாள்களுக்கு முன்பு தகவல் கிடைத்தது. இதுதொடர்பாக உடனேயே, துறைரீதியான விசாரணை நடத்திட உயரதிகாரிகளுக்கு கடிதம் அனுப்பி வைக்கப்பட்டது. அதன்பேரில் சமூக நலத்துறை இணை இயக்குனர் நேரடியாக வந்து ராஜபாளையம் அலுவலகத்தில் பயனாளிகளிடம் விசாரணை நடத்தினார். புகாருக்குள்ளான சமுக நல விரிவாக்க அலுவலர் மேக்தா மேரியிடமும் விசாரணை நடத்தப்பட்டது. விசாரணையில் அவர் லஞ்சம் வாங்கியது உறுதி செய்யப்பட்டது.

இதையடுத்து அவர் மீது துறைரீதியான மேல் நடவடிக்கை எடுப்பதற்கு அனைத்து அறிக்கைகளும் தயார் செய்யப்பட்டு வழங்கப்பட்டுள்ளது. விரைவில் அவர் பணியிடை நீக்கம் செய்யப்படுவார். இந்தநிலையில்தான், இந்த விவகாரம் தொடர்பான வீடியோ தற்போது சமூக வலைத்தளங்களில் வெளியாகி வைரலாகியுள்ளது.

அரசு திட்டங்களை உரியவர்களுக்கு கொண்டு சேர்ப்பதே அரசு அலுவலர்களின் கடமை. ஆகவே கடமையைச் செய்ய யாரேனும் லஞ்சம் கேட்டாலோ அல்லது தவறினாலோ அதுகுறித்து உடனடியாக பொதுமக்கள் புகார் தெரிவிக்கலாம். சம்பந்தப்பட்டவர்கள் மீது உரிய நடவடிக்கை எடுக்கப்படும்" என்றார்.