அரியலூா் அரசு மருத்துவக் கல்லூரி மருத்துவமனையில் கூடுதலாக மருத்துவா்கள், செவிலியா்களை நியமிக்க வலியுறுத்தல்

அரியலூா் அரசு மருத்துவக் கல்லூரியில் நோயாளிகளின் நலனை கருத்தில்கொண்டு கூடுதலாக மருத்துவா்கள், செவிலியா்களை நியமிக்க வேண்டுமென, உலக திருக்குறள் கூட்டமைப்பு ஆட்சிமன்றக் கூட்டத்தில் வலியுறுத்தப்பட்டது.

பெரம்பலூரில் உலகத் திருக்கு கூட்டமைப்பின் ஆட்சி மன்றக் கூட்டம் ஞாயிற்றுக்கிழமை நடைபெற்றது. இக் கூட்டத்துக்கு, கூட்டமைப்புத் தலைவா் மு. ஞானமூா்த்தி தலைமை வகித்தாா். பொதுச் செயலா் பேராசிரியா் தங்க. ஆதிலிங்கம் கூட்ட நோக்க உரை நிகழ்த்தினாா். அறக்கட்டளைத் தலைவா் தா. சம்பத் நிா்வாக அறிக்கையும், கூட்டமைப்பு பொருளாளா் பெ. சவுந்தர்ராஜன் கூட்டமைப்பின் நிதிநிலை அறிக்கையும் வாசித்தனா். அமைப்புச் செயலா் ப. காசிநாதன் அமைப்பு விதிகள் குறித்து விளக்கி கூறினாா்.

துணைத் தலைவா்கள் சீனி. பழமலை, வ. தசரதன், பெ. பசுபதி, துணைப் பொதுச் செயலா்கள் நோ. ஆல்ஃ பி, காா்த்தி, கணேசன் ஆகியோா் கருத்துரையாற்றினா்.

இக் கூட்டத்தில், திருக்குறளை உலகப் பொது நூலாக அறிவிப்பதற்கு யுனெஸ்கோவின் கருத்துரையை ஏற்று, தஞ்சாவூா் தமிழ்ப் பல்கலைக்கழகத்தில் திருக்குறளுக்காக தனி அருங்காட்சியகம் அமைத்து வரும் தமிழக முதல்வருக்கு நன்றியும், பாராட்டும் தெரிவிப்பது,

பிற்படுத்தப்பட்ட மக்களுக்கு அரசு வேலைவாய்ப்புகளில் 27 சதவீத இட ஒதுக்கீடு வழங்க வேண்டும் எனும் மண்டல் கமிஷன் பரிந்துரையை மத்திய அரசு முழுமையாக நிறைவேற்ற வேண்டும். மத்திய அரசு, மாநில அரசுக்கு ஒதுக்கும் நிதியின் அளவை 50 சதவீதமாக உயா்த்த வேண்டும்.

பெரம்பலூா், அரியலூா், கடலுா் மாவட்டங்கள் பயன்பெறும் வகையில், காவிரி ஆற்றில் முக்கொம்பிலிருந்து துறையூா், பெரம்பலூா், வேப்பந்தட்டை வழியாக வெள்ளாறு வரை நீா்வழித் தடம் அமைத்து மருதையாறு, ஆனைவாரி ஓடை, சின்னாறு, வெள்ளாறு ஆகியவற்றுடன் இணைக்கும் காவிரி-வெள்ளாறு இணைப்புத் திட்டத்தை மத்திய, மாநில அரசுகள் செயல்படுத்தவேண்டும்.

அரியலூா் அரசு மருத்துவக் கல்லூரி மருத்துவமனையில் நோயாளிகளின் நலன்கருதி கூடுதலான மருத்துவா், செவிலியா்களை நியமிக்க வேண்டும். அரசு ஊழியா்களுக்கு பழைய ஓய்வூதியத் திட்டத்தை நடைமுறைப் படுத்தவேண்டும் என்பன உள்ளிட்ட பல்வேறு தீா்மானங்கள் நிறைவேற்றப்பட்டன. நிறைவாக, துணைப் பொதுச் செயலா் எஸ். வி. சாந்தி நன்றி கூறினாா்.