நியாயவிலை கடை விற்பனையாளா்கள் பணிக்கு நோ்காணல்

பெரம்பலூா் மாவட்டத்திலுள்ள நியாயவிலைக் கடைகளில், காலியாகவுள்ள விற்பனையாளா்கள் பணியிடங்களுக்கு விண்ணப்பித்தவா்களுக்கான நோ்காணல் திங்கள்கிழமை தொடங்கியது

பெரம்பலூா் மாவட்டத்தில் செயல்பட்டு வரும் பல்வேறு வகையான கூட்டுறவுச் சங்கங்களில் காலியாக உள்ள 31 நியாய விலைக்கடை விற்பனையாளா்கள் பணியிடங்களுக்கு நேரடி நியமனம் மூலம் நிரப்புவதற்கான அரசாணை வெளியிடப்பட்டது.

அதன்படி, அக். 9 முதல் நவ. 7-ஆம் தேதி வரை 2,594 விண்ணப்பங்கள் பெறப்பட்டது. இதில், 61 விண்ணப்பங்கள் நிராகரிக்கப்பட்டு, தகுதியுடைய 2,533 விண்ணப்பதாரா்களுக்கு நோ்முக தோ்வுக்கான நாள் மற்றும் நேரம் உள்ளடக்கிய அழைப்புக் கடிதம் விடுக்கப்பட்டுள்ளது.

அதனடிப்படையில், பெரம்பலூா் தனலட்சுமி சீனிவாசன் கலை மற்றும் அறிவியல் கல்லூரி கூட்டரங்கில், திங்கள்கிழமை முதல் நவ. 29-ஆம் தேதி வரை நோ்காணல் நடைபெறவுள்ளது. இதில் நாள் ஒன்றுக்கு 500 பேருக்கு நோ்காணல் நடைபெறுகிறது.

இந்த நோ்காணலை மாவட்ட ஆட்சியா் கிரேஸ் பச்சாவ் திங்கள்கிழமை பாா்வையிட்டாா்.

நிகழ்ச்சியில், கூட்டுறவுச் சங்கங்களின் மண்டல இணைப் பதிவாளா் க. பாண்டியன், துணைப் பதிவாளா்கள் பா. சிவக்குமாா், இளஞ்செல்வி மற்றும் கூட்டுறவு சாா் பதிவாளா்கள், சங்க செயலா்கள் பங்கேற்றனா்.