அஸ்ஸாம் நிலச்சரி சுரங்கத்தில் சிக்கிய 9 தொழிலாளா்கள்- ஒருவா் சடலமாக மீட்பு

அஸ்ஸாமில் நிலக்கரி சுரங்கத்தில் சிக்கிய 9 தொழிலாளா்களில் ஒருவா் சடலமாக புதன்கிழமை மீட்கப்பட்டாா்.

கடந்த திங்கள்கிழமை அஸ்ஸாமின் தீமா ஹசாவோ மாவட்டத்தில் உள்ள நிலக்கரி சுரங்கத்தில் 9 தொழிலாளா்கள் பணியில் ஈடுபட்டிருந்தனா். அப்போது திடீரென சுரங்கத்துக்குள் பெருமளவு தண்ணீா் பாய்ந்ததால், தொழிலாளா்கள் அனைவரும் சுரங்கத்துக்குள் சிக்கிக் கொண்டனா். நிலத்தடி நீா் கால்வாயில் இருந்து சுரங்கத்துக்குள் தண்ணீா் பாய்ந்து இந்தத் துயர சம்பவம் ஏற்பட்டிருக்கக் கூடும் என்று கூறப்படுகிறது.

தகவலின் அடிப்படையில் ராணுவம், கடற்படை, தேசிய மற்றும் மாநில பேரிடா் மீட்புப் படைகள் மீட்புப் பணியில் ஈடுபட்ட நிலையில், அந்தப் பணி 3-ஆவது நாளாக புதன்கிழமை நீடித்தது. அப்போது சுரங்கத்துக்குள் நீா்மூழ்கி வீரா்கள் இறங்கி, தொழிலாளா் ஒருவரை சடலமாக மீட்டனா்.

தொழிலாளரின் சடலம் நிலத்தில் இருந்து 85 அடி ஆழத்தில் மீட்கப்பட்டதாகவும், சுரங்கம் முழுவதும் தண்ணீா் இருப்பதால் உள்ளே சரியாகப் பாா்க்க முடியவில்லை என்றும் நீா்மூழ்கி வீரா் ஒருவா் தெரிவித்தாா்.

இதுதொடா்பாக மாநில முதல்வா் ஹிமந்த விஸ்வ சா்மா ‘எக்ஸ்’ தளத்தில் வெளியிட்ட பதிவில், ‘உயிரிழந்த தொழிலாளரின் சடலத்தை 21 நீா்மூழ்கி வீரா்கள் மீட்டனா். மீட்புப் பணிகள் முழு வீச்சில் நடைபெற்று வருகின்றன’ என்றாா்.

அந்தச் சுரங்கம் சட்டவிரோதமாக செயல்பட்டு வந்தது போலத் தெரிவதாக ஹிமந்த விஸ்வ சா்மா ஏற்கெனவே தெரிவித்த நிலையில், எஞ்சிய 8 தொழிலாளா்களை உயிருடன் மீட்பதற்கான வாய்ப்புகள் குறைவு என்று கூறப்படுகிறது.