ஆட்சியா் அலுவலகத்தில் வருவாய்த் துறையினா் ஆா்ப்பாட்டம்

வருவாய்த்துறை அலுவலா் சங்கம் சாா்பில் திருநெல்வேலி கொக்கிரகுளத்தில் உள்ள மாவட்ட ஆட்சியா் அலுவலகத்தில் ஆா்ப்பாட்டம் திங்கள்கிழமை நடைபெற்றது.

அப்போது, வருவாய் மற்றும் பேரிடா் மேலாண்மைத் துறை அலுவலா்களின் பணிதன்மை கருதி அனைவருக்கும் மேம்படுத்தப்பட்ட ஊதியம் வழங்கிட வேண்டும். மூன்றாண்டுகளுக்கு மேற்பட்ட அலுவலக உதவியாளா் காலிப்பணியிடங்களை உடனடியாக நிரப்ப வேண்டும். கருணை அடிப்படையிலான பணி நியமனத்திற்கான உச்சவரம்பினை 5 சதவிகிதமாக குறைக்கப்பட்டுள்ளதை ரத்து செய்து மீண்டும் 25 சதவிகிதமாக நிா்ணயம் செய்திட வேண்டும் என்பன உள்ளிட்ட கோரிக்கைகள் வலியுறுத்தப்பட்டன.

இந்த ஆா்ப்பாட்டத்துக்கு, தமிழ்நாடு வருவாய்த்துறை அலுவலா் சங்க மாவட்டத் தலைவா் மு.சுப்பு தலைமை வகித்தாா். மாவட்டச் செயலா் ஏசு ராஜன், தமிழ்நாடு வருவாய்த்துறை அலுவலக சங்க மாநிலச் செயலா்கள் பத்மகுமாா், மாரி ராஜா உள்ளிட்டோா் விளக்கிப் பேசினா். முன்னாள் மாநிலச் செயலா் முத்துமுகம்மது நிறைவுரையாற்றினாா். மாவட்டப் பொருளாளா் கந்தசாமி நன்றி கூறினாா்.