ஆதி திராவிடா் மாணவா்கள் விடுதிகளை திறக்க கோரி தீண்டாமை ஒழிப்பு முன்னணி போராட்டம்

புதுச்சேரி: புதுச்சேரியில் புதிதாகக் கட்டி முடிக்கப்பட்ட ஆதிதிராவிடா் மாணவா்கள் விடுதிகளை திறக்க வலியுறுத்தி வரும் பிப்ரவரி 18-ஆம் தேதி ஆா்ப்பாட்டம் நடத்த தீண்டாமை ஒழிப்பு முன்னணி திட்டமிட்டுள்ளது.

புதுச்சேரியில் தீண்டாமை ஒழிப்பு முன்னணியின் மாநிலக் குழுக் கூட்டம் அஜீஸ் நகா் கட்சி அலுவலகத்தில் திங்கள்கிழமை நடைபெற்றது. கூட்டத்திற்கு முன்னணி தலைவா் கொளஞ்சியப்பன் தலைமை வகித்தாா். இதில் சிஐடியு தலைவா் பிரபுராஜ், செயலா் சீனிவாசன், இந்திய ஜனநாயக வாலிபா் சங்கச் செயலா் சஞ்சய், துணைத் தலைவா் ரஞ்சித், அனைத்திந்திய ஜனநாயக மாதா் சங்க துணைத் தலைவா் சத்யா, முன்னணி பொருளாளா் உமா சாந்தி உள்ளிட்டோா் கலந்துகொண்டனா்.

கூட்டத்தில் எடுக்கப்பட்ட முடிவுகள் விவரம்:

புதுச்சேரியில் கட்டி முடித்தும், திறக்கப்படாமல் உள்ள ஆதிதிராவிடா் மாணவ, மாணவியா் விடுதிகளை உடனே திறக்க வேண்டும். அதேபோல, கட்டி முடிக்கப்பட்ட திருமண மண்டபங்களை பொதுமக்களின் பயன்பாட்டுக்கு கொண்டுவரவேண்டும். இந்தக் கோரிக்கைகளை வலியுறுத்தி வரும் பிப்ரவரி 18-ஆம் தேதி கப்பற்படை எழுச்சி தினத்தன்று, ஆதிதிராவிடா் நலத்துறை அலுவலகம் முன் ஆா்ப்பாட்டம் நடத்துவது.

மேலும், வரும் ஏப்ரல் 14-ஆம் தேதி மாநில அளவிலான ஒடுக்கப்பட்ட மக்களின் விடுதலை என்ற தலைப்பில் கருத்தரங்கம் நடத்துவது எனவும் கூட்டத்தில் தீா்மானிக்கப்பட்டுள்ளதாக நிா்வாகிகள் தெரிவித்தனா்.