ஆத்தூா் வட்டாட்சியா் அலுவலக ஆதாா் சேவை மையத்தில் ஊழியரை நியமிக்கக் கோரிக்கை

ஆத்தூா் வட்டாட்சியா் அலுவலகத்தில் கடந்த இரண்டு மாதங்களாக செயல்படாமல் உள்ள ஆதாா் சேவை மையத்தில் ஊழியரை நியமிக்க வேண்டும் என பொதுமக்கள் கோரிக்கை விடுத்தனா்.

திண்டுக்கல் மாவட்டம், ஆத்தூா் வட்டத்தில் ஆத்தூா், அய்யம்பாளையம், சின்னாளப்பட்டி ஆகிய மூன்று பிரிக்காக்களும், 22 கிராம நிா்வாக அலுவலகங்களும் உள்ளன.

இந்த நிலையில், ஆத்தூா் வட்டாட்சியா் அலுவலகத்தில் உள்ள ஆதாா் சேவை மையம் கடந்த இரண்டு மாதங்களாக ஊழியா் பணிக்கு வராததால் செயல்படாமல் உள்ளது. இந்த சேவை மையத்தை தினமும் வட்டாட்சியா் அலுவலக உதவியாளா்கள் திறந்து மட்டும் வைக்கின்றனா். ஆனால் ஊழியா்கள் யாரும் பணிக்கு வராததால் இங்கு ஆதாா் அட்டையை புதுப்பிக்கவும், பிழைகளை திருத்துவதற்கும், கருவிழி, ரேகைப் பதிவு, புகைப்படம் மாற்றம், கைப்பேசி எண் மாற்றம் உள்ளிட்ட பணிகளுக்காக வரும் பள்ளி, கல்லூரி மாணவ, மாணவிகள், முதியோா், கா்ப்பிணி பெண்கள் ஏமாற்றமடைவதுடன், வேறு மையங்களை தேடிச் செல்ல வேண்டியுள்ளது.

குறிப்பாக மலைக் கிராமமான மணலூா் ஊராட்சிக்குள்பட்ட பெரும்பாறை, கொங்கப்பட்டி, மஞ்சள் பரப்பு, குத்துக்காடு உள்ளிட்ட பகுதி மக்கள் பெரும் அவதி அடைந்து வருகின்றனா். இதுகுறித்து சம்பந்தப்பட்ட வருவாய்த் துறை அலுவலரிடம், இந்த ஆதாா் மையத்தில் ஊழியரை நியமிக்க வேண்டும் என கோரிக்கை விடுத்தும் நடவடிக்கை எடுக்கப்பட வில்லை. இதனால் பொதுமக்கள் தனியாா் இ- சேவை மையங்கள், அஞ்சல் அலுவலகங்களை நாடிச் செல்கின்றனா். அதிலும் தனியாா் சேவை மையங்களில் கூடுதல் கட்டணம் வசூலிக்கப்படுவதாக புகாா் கூறப்படுகிறது.

இதுகுறித்து வட்டாட்சியா் முத்துமுருகனிடம் கேட்ட போது அவா் கூறியதாவது: ஆத்தூா் வட்டாட்சியா் அலுவலகத்தில் விரைவில் ஆதாா் சேவை மையம் செயல்பட நடவடிக்கை எடுக்கப்படும் என்றாா் அவா்.