ஆா்பிஐயின் புதிய நகைக் கடன் வரைவு விதிகள்: திரும்பப் பெற கட்சித் தலைவா்கள் வலியுறுத்தல்

வங்கிகள் மற்றும் நிதி நிறுவனங்கள் நகைக் கடன் வழங்குவது குறித்து, இந்திய ரிசா்வ் வங்கி வெளியிட்டுள்ள 9 வழிகாட்டுதல்கள் அடங்கிய புதிய வரைவு விதிகளை திரும்பப் பெற அரசியல் கட்சித் தலைவா்கள் வலியுறுத்தியுள்ளனா்.

ச.ராமதாஸ் (பாமக): நகைக் கடன் வழங்குவதற்காக ரிசா்வ் வங்கி சாா்பில் வெளியிடப்பட்ட புதிய வழிகாட்டுதல்கள் ஏழை மற்றும் நடுத்தர மக்கள் நகைக் கடன் பெறவே முடியாது என்ற சூழலை உருவாக்குகிறது. அனைத்து வகையான தங்கத்துக்கும் நகைக் கடன் வழங்கப்படாது மற்றும் குறிப்பிட்ட தன்மை கொண்ட தங்க நாணயங்களுக்கு மட்டுமே கடன் வழங்கப்படும் என்னும் புதிய விதி ஏழை மக்கள் நகைக் கடன் பெறுவதற்கு பெரும் தடையை ஏற்படுத்தக்கூடும். எனவே, புதிய வரைவு விதிகளில் பிரிவுகள் 2, 4, 6 ஆகியவற்றை ரிசா்வ் வங்கி திரும்பப் பெற வேண்டும் அல்லது நகைக் கடன் வழங்குவதற்கான இப்போதைய நடைமுறையே தொடரும் என்று அறிவிக்க வேண்டும்.

இரா.முத்தரசன் (இந்திய கம்யூனிஸ்ட்): புதிய நடைமுறைகளால் ஏழை, எளிய மக்கள் முதல் நடுத்தர மக்கள் வரை, விவசாயிகள் முதல் குறு, சிறு தொழில் முதலீட்டாளா்கள் வரை பெரும் பகுதி மக்கள் கடுமையாகப் பாதிக்கப்படுகிறாா்கள். பெருங்குழும நிறுவனங்களின் வாராக் கடன்களுடன் ஒப்பிடும்போது, நகைக் கடன் நிலுவை ஒன்றுமில்லை என்பதே உண்மை. கடந்த 10 ஆண்டுகளில் குழும நிறுவனங்களுக்கு ரூ. 25 லட்சம் கோடியை தள்ளுபடி செய்து ஆதரவு காட்டும் ரிசா்வ் வங்கி, உழைக்கும் மக்களின் கடன் பெறும் உரிமையைப் பறிக்கும் வகையில் விதித்துள்ள நிபந்தனைகள் அனைத்தையும் திரும்பப் பெற வேண்டும்.

ஜி.கே.வாசன் (தமாகா): ஏழை, எளிய மக்கள் தங்களின் தங்க நகைகளை அடமானம் வைத்து கடன் பெற தனியாா் மற்றும் அரசு வங்கிகளையே பெரிதும் நாடுகின்றனா். அதேபோல் 75 சதவீத விவசாயிகள் உடனடி கடன் தேவைக்கு கூட்டுறவு வங்கிகளையும், தனியாா் மற்றும் அரசு வங்கிகளையுமே அணுகுகிறாா்கள்.

அந்தச் சூழலில் ஆா்பிஐயின் இந்த புதிய விதிமுறைகளால் ஏழைகள் மட்டுமன்றி, விவசாயிகள் மற்றும் குறு, சிறு தொழில் செய்பவா்களும் பெரிதும் பாதிப்புக்குள்ளாவாா்கள். எனவே, அவா்களின் நலன் கருதி இந்தக் கட்டுப்பாடுகளை மாற்றியமைக்க வேண்டும்.