இங்கிலாந்தை வீழ்த்தி ஆஷஸ் தொடரை தக்கவைத்த ஆஸ்திரேலியா!

இங்கிலாந்துக்கு எதிரான முதல் டி20 போட்டியில் ஆஸ்திரேலிய அணி 57 ரன்கள் வித்தியாசத்தில் வெற்றி அபார வெற்றி பெற்றது.

ஆஸ்திரேலியா மற்றும் இங்கிலாந்து அணிகளுக்கு இடையிலான முதல் டி20 போட்டி இன்று (ஜனவரி 20) சிட்னியில் நடைபெற்றது. இந்தப் போட்டியில் டாஸ் வென்ற இங்கிலாந்து அணி பந்துவீச்சைத் தேர்வு செய்ய, ஆஸ்திரேலியா முதலில் விளையாடியது.

பெத் மூனி அதிரடி

ஆஸ்திரேலிய அணியின் தொடக்க வீராங்கனைகளாக பெத் மூனி மற்றும் ஜியார்ஜியா இருவரும் களமிறங்கினர். இந்த இணை ஆஸ்திரேலிய அணிக்கு நல்ல தொடக்கத்தைத் தந்தது. இருப்பினும், ஜியார்ஜியா 21 ரன்களில் ஆட்டமிழந்தார். அதன் பின், பெத் மூனியுடன் ஜோடி சேர்ந்த ஃபோப் லிட்ச்ஃபீல்டு சிறிது நேரம் களத்தில் நீடித்தார். அவர் 20 பந்துகளில் 25 ரன்கள் எடுத்து ரன் அவுட் ஆனார். தொடக்கம் முதலே அதிரடியான ஆட்டத்தை வெளிப்படுத்திய பெத் மூனி அரைசதம் கடந்து அசத்தினார். அவர் 51 பந்துகளில் 75 ரன்கள் எடுத்தார். அதில் 11 பவுண்டரிகள் அடங்கும்.

இதையும் படிக்க: லக்னௌ அணியின் கேப்டனாக ரிஷப் பந்த் நியமனம்!

பெத் மூனியுடன் இணைந்து விளையாடிய கேப்டன் தஹிலா மெக்ராத் அதிரடியாக 9 பந்துகளில் 26 ரன்கள் குவித்தார். அதில் 4 பவுண்டரிகள் மற்றும் ஒரு சிக்ஸர் அடங்கும். இறுதியில், ஆஸ்திரேலிய அணி நிர்ணயிக்கப்பட்ட 20 ஓவர்களின் முடிவில் 7 விக்கெட்டுகளை இழந்து 198 ரன்கள் எடுத்தது.

இங்கிலாந்து தரப்பில் லாரென் பெல், சோஃபி எக்கல்ஸ்டோன் தலா 2 விக்கெட்டுகளைக் கைப்பற்றினர். ஃப்ரேயா கெம்ப் மற்றும் சார்லி டீன் தலா ஒரு விக்கெட்டினைக் கைப்பற்றினர்.

ஆஸ்திரேலியா வெற்றி

199 ரன்கள் எடுத்தால் வெற்றி என்ற இலக்கை நோக்கி இங்கிலாந்து அணி களமிறங்கியது. அந்த அணிக்கு தொடக்கமே பேரதிர்ச்சியாக அமைந்தது. தொடக்க வீராங்கனைகள் இருவரும் ரன் ஏதும் எடுக்காமல் ஆட்டமிழந்தனர். இதனையடுத்து, சோஃபியா டங்க்லி மற்றும் நாட் ஷிவர் பிரண்ட் ஜோடி சேர்ந்தனர். இந்த இணை ஆட்டத்தின் பொறுப்பை உணர்ந்து விளையாடியது. இருப்பினும், நாட் ஷிவர் பிரண்ட் 12 பந்துகளில் 20 ரன்கள் எடுத்து ஆட்டமிழந்தார். அதில் 5 பவுண்டரிகள் அடங்கும். அதன் பின், களமிறங்கிய கேப்டன் ஹீதர் நைட் 18 ரன்களில் ஆட்டமிழந்தார்.

தொடக்கம் முதலே அதிரடியாக விளையாடிய சோஃபியா டங்க்லி 30 பந்துகளில் 59 ரன்கள் எடுத்தார். அதில் 6 பவுண்டரிகள் மற்றும் 4 சிக்ஸர்கள் அடங்கும். மற்ற வீராங்கனைகள் சொற்ப ரன்களில் ஆட்டமிழந்தனர். இறுதியில், 16 ஓவர்களின் முடிவில் இங்கிலாந்து அணி 141 ரன்களுக்கு ஆட்டமிழந்தது. இதன் மூலம், ஆஸ்திரேலிய அணி 57 ரன்கள் வித்தியாசத்தில் வெற்றி பெற்றது.

இதையும் படிக்க: 95 சதவிகித டிக்கெட்டுகள் விற்றுத் தீர்ந்தன; முதல் டி20 போட்டிக்கு தயாராகும் ஈடன் கார்டன்ஸ்!

ஆஸ்திரேலியா தரப்பில் ஜியார்ஜியா வேர்ஹம் 3 விக்கெட்டுகளைக் கைப்பற்றினார். அலானா கிங் 2 விக்கெட்டுகளையும், மேகன் சூட், கிம் கார்த், அன்னாபெல் சதர்லேண்ட் மற்றும் தஹிலா மெக்ராத் தலா ஒரு விக்கெட்டினையும் கைப்பற்றினர்.

இந்த வெற்றியின் மூலம் 3 போட்டிகள் கொண்ட டி20 தொடரில் ஆஸ்திரேலிய அணி 1-0 என்ற கணக்கில் முன்னிலை பெற்றுள்ளது. அத்துடன், ஆஷஸ் தொடரையும் தக்கவைத்துள்ளது.