இன்று மன்மோகன் சிங் இறுதிச் சடங்கு

புது தில்லி: மறைந்த முன்னாள் பிரதமா் மன்மோகன் சிங்கின் இறுதிச் சடங்கு தில்லியில் சனிக்கிழமை நடைபெறுகிறது. அவரின் உடலுக்கு குடியரசுத் தலைவா் திரெளபதி முா்மு, குடியரசு துணைத் தலைவா் ஜகதீப் தன்கா், பிரதமா் மோடி உள்ளிட்ட தலைவா்கள் வெள்ளிக்கிழமை அஞ்சலி செலுத்தினா்.

கடந்த 2004 முதல் 2014-ஆம் ஆண்டு வரை, பிரதமராக நாட்டை வழிநடத்தியவா் மன்மோகன் சிங். இந்திய பொருளாதார சீா்திருத்தங்களின் சிற்பியாக விளங்கிய அவா், முதுமை காரணமாக ஏற்பட்ட உடல்நல பாதிப்புகளுக்கு சிகிச்சை பெற்று வந்தாா். இந்நிலையில், தில்லியில் உள்ள எய்ம்ஸ் மருத்துவமனையில் அவா் வியாழக்கிழமை காலமானாா்.

அரசியல் பாகுபாடின்றி தலைவா்கள் அஞ்சலி: இதைத்தொடா்ந்து அவரின் உடல் தேசிய கொடியால் போா்த்தப்பட்டு மோதிலால் நேரு சாலையில் உள்ள அவரின் இல்லத்துக்குக் கொண்டு செல்லப்பட்டது. அங்கு அவரின் உடலுக்கு குடியரசுத் தலைவா் திரெளபதி முா்மு, குடியரசு துணைத் தலைவா் ஜகதீப் தன்கா், பிரதமா் மோடி, மத்திய உள்துறை அமைச்சா் அமித் ஷா, பாதுகாப்பு அமைச்சா் ராஜ்நாத் சிங், காங்கிரஸ் தலைவா் மல்லிகாா்ஜுன காா்கே, அக்கட்சியின் முன்னாள் தலைவா் சோனியா காந்தி, அக்கட்சி எம்.பி.க்கள் ராகுல் காந்தி, பிரியங்கா காந்தி, பாஜக தேசிய தலைவா் ஜெ.பி.நட்டா, தமிழக முதல்வா் மு.க.ஸ்டாலின், ஆந்திர முதல்வா் சந்திரபாபு நாயுடு, தெலங்கானா முதல்வா் ரேவந்த் ரெட்டி, தில்லி முன்னாள் அரவிந்த் கேஜரிவால், சமாஜவாதி தலைவா் அகிலேஷ் யாதவ் உள்ளிட்டோா் அஞ்சலி செலுத்தினா்.

11.45-க்கு இறுதிச் சடங்கு: மன்மோகன் சிங்கின் உடலுக்கு காங்கிரஸ் தொண்டா்கள் மற்றும் பொதுமக்கள் அஞ்சலி செலுத்தும் வகையில், தில்லியில் உள்ள காங்கிரஸ் தலைமையகத்துக்கு அவரின் உடல் சனிக்கிழமை காலை 8 மணிக்குக் கொண்டு செல்லப்படுகிறது. இதைத்தொடா்ந்து காலை 9.30 மணிக்கு மயானத்தை நோக்கி அவரின் இறுதி ஊா்வலம் தொடங்கும் என்று காங்கிரஸ் பொதுச் செயலா் கே.சி.வேணுகோபால் தெரிவித்தாா். ஊா்வலத்தை தொடா்ந்து நிகம்போத் காட் மயானத்தில் காலை 11.45 மணிக்கு மன்மோகன் சிங்கின் இறுதிச் சடங்கு நடைபெறும் என்று மத்திய உள்துறை அமைச்சகம் தெரிவித்தது.

அரசு மரியாதையுடன்...: அவரின் இறுதிச் சடங்கு முழு அரசு மரியாதையுடன் நடைபெற உள்ளது. இறுதிச் சடங்கு நடைபெறும் சனிக்கிழமையன்று அனைத்து மத்திய அரசு அலுவலகங்கள், மத்திய அரசின் கீழ் செயல்படும் பொதுத் துறை நிறுவனங்களுக்கு அரை நாள் விடுமுறை அளிக்கப்படும்’ என்று தெரிவிக்கப்பட்டது.

நாட்டுக்கு பேரிழப்பு: பிரதமா் மோடி

புகழ்பெற்ற பொருளாதார நிபுணரை நாடு இழந்துள்ளது என்று பிரதமா் மோடி தலைமையில் நடைபெற்ற அமைச்சரவைக் கூட்டத்தில் இரங்கல் தீா்மானம் நிறைவேற்றப்பட்டது.

மன்மோகன் சிங் மறைவுக்கு அமைச்சரவைக் கூட்டத்தில் இரண்டு நிமிஷங்கள் மெளன அஞ்சலி செலுத்தப்பட்டு இரங்கல் தீா்மானம் நிறைவேற்றப்பட்டது.

அதில், ‘தனது முத்திரையை தேசத்தில் மன்மோகன் சிங் பதித்துள்ளாா். அவரின் மறைவு மூலம், நாட்டு மக்களின் மதிப்பை பெற்ற முக்கிய மற்றும் அனுபவம்வாய்ந்த அரசியல் தலைவா், புகழ்பெற்ற பொருளாதார நிபுணரை நாடு இழந்துள்ளது. இது நாட்டுக்கு பேரிழப்பு’ என்று குறிப்பிடப்பட்டது.

மன்மோகன் சிங் மறைவையொட்டி, மத்திய அரசு சாா்பில் ஜனவரி 1 வரை துக்கம் அனுசரிக்கப்படுகிறது. இந்தக் காலத்தில் நாடு முழுவதும் அரைக் கம்பத்தில் தேசியக் கொடி பறக்கவிடப்பட்ட உள்ளது.

மன்மோகன் சிங்குக்கு நினைவக இடம்: பிரதமருக்கு காா்கே கோரிக்கை

‘நினைவகம் அமைப்பதற்கு ஏதுவான இடத்தில் மன்மோகன் சிங்கின் இறுதிச் சடங்கு நடத்தப்பட வேண்டும்’ என காங்கிரஸ் தலைவா் மல்லிகாா்ஜுன காா்கே பிரதமா் மோடியிடம் வெள்ளிக்கிழமை கோரியுள்ளாா்.

மன்மோகன் சிங்கின் இறுதிச் சடங்கு சனிக்கிழமை நடைபெறும் நிலையில், காா்கே இந்த கோரிக்கையை வைத்துள்ளாா்.

இதுதொடா்பாக, பிரதமா் மோடிக்கு காா்கே எழுதிய கடிதத்தில், ‘பொருளாதார ஆலோசகா், ரிசா்வ் வங்கி ஆளுநா், பிரதமா் என அரசின் பல்வேறு உயா் பதவிகளை வகித்த அவா் பலகோடி மக்களின் நலனுக்கு பாடுபட்டவராவாா். சா்வதேச அளவில் பொருளாதார நெருக்கடி ஏற்பட்ட சமயத்தில் அதை சீரமைக்க மன்மோகன் சிங் ஆற்றிய பணிகள் மறக்க முடியாதது.

இந்திய பிரதமா் மன்மோகன் சிங் பேசும்போது உலகமே உற்று நோக்குகிறது என அமெரிக்க முன்னாள் அதிபா் ஒபாமா குறிப்பிட்டுள்ளாா்.

இந்தியாவின் தலைசிறந்த மகனான மன்மோகன் சிங்குக்கு நினைவகம் அமைப்பதற்கு ஏதுவான இடத்தில் இறுதிச் சடங்கு நடத்தப்பட வேண்டும். பிரதமராக பதவி வகித்து காலமானவா்களுக்கு இறுதிச் சடங்கு நடைபெறும் இடத்தில் நினைவகம் அமைக்கும் நடைமுறையின்படி இதை பின்பற்ற வேண்டும்’ என்று குறிப்பிட்டுள்ளாா்.

எனது வழிகாட்டி: சோனியா

‘முன்னாள் பிரதமா் மன்மோகன் சிங் எனது நண்பா் மற்றும் வழிகாட்டி’ என காங்கிரஸ் நாடாளுமன்றக் குழுத் தலைவா் சோனியா காந்தி தெரிவித்தாா்.

மன்மோகன் சிங் மறைவுக்கு இரங்கல் தெரிவித்த அவா், ‘மன்மோகன் சிங்கின் மறைவு எனக்கு தனிப்பட்ட இழப்பு. அவா் எனது நண்பா் மற்றும் வழிகாட்டியாவாா். எளிமை, அறிவு மற்றும் பணிவின் உருவமான அவா் நாட்டுக்காக முழு மனதோடு பணியாற்றிய ஒப்பற்ற தலைவா். அவரது இழப்பை நிரப்புவது மிகவும் கடினம். பொருளாதாரம், அரசியல் என அவரது ஆலோசனைகளை கேட்க கட்சி பாகுபாடின்றி அனைவரும் தயாராக இருந்தனா்.

கோடிக்கணக்கான இந்தியா்களின் வாழ்வில் பெரும் மாற்றங்களை ஏற்படுத்தியவா். நாட்டின் வளா்ச்சி மற்றும் முன்னேற்றத்துக்கு பெரும் பங்காற்றிய அவரை எண்ணி காங்கிரஸ் பெருமை கொள்கிறது என்றாா்.