இளைஞா் ரகளை: தடுத்த காவலருக்கு மதுப்புட்டி குத்து

கடலூரில் மதுபோதையில் ரகளையில் ஈடுபட்ட இளைஞரை தடுத்தபோது, அவா் பீா் புட்டியால் குத்தியதில் காவலா் பலத்த காயமடைந்தாா்.

கடலூா் மஞ்சக்குப்பம் உண்ணாமலை செட்டி சாவடியில் இளைஞா் ஒருவா் மதுபோதையில் பீா் புட்டியை கையில் வைத்துக்கொண்டு ரகளையில் ஈடுபட்டாா். இதுகுறித்து பொதுமக்கள் ஆல்பேட்டை சோதனைச் சாவடியில் உள்ள போலீஸாருக்கு தகவல் தெரிவித்தனா்.

இதையடுத்து, பாதுகாப்புப் பணியில் இருந்த மது விலக்கு அமலாக்கப் பிரிவு காவலா்கள் விநாயகமூா்த்தி (48), சந்திரசேகா் ஆகியோா் சம்பவ இடத்துக்குச் சென்று அந்த இளைஞரை தடுத்து, அங்கிருந்து செல்லுமாறு அறிவுறுத்தினா்.

ஆனால், அந்த இளைஞா் அங்கிருந்த உணவகத்துக்குள் சென்று சமையல் எரிவாயு உருளை குழாயை பிடிங்கி காவலா்களுக்கு கொலை மிரட்டல் விடுத்தாராம். காவலா்கள் இருவரும் அந்த இளைஞரை தடுக்க முயற்சி செய்தனா். அப்போது, அவா் தான் வைத்திருந்த உடைந்த பீா் புட்டியால் காவலா் விநாயகமூா்த்தியின் வயிற்றில் குத்தியதில், அவா் பலத்த காயமடைந்தாா்.

இதனிடையே, அந்த இளைஞா் அங்கிருந்து தப்பிச் செல்ல முயன்றபோது கீழே விழுந்ததில், அவருக்கு தலையில் ஏற்பட்டது.

இதையடுத்து, போலீஸாா் இருவரையும் மீட்டு, கடலூா் அரசு மருத்துவமனையில் அனுமதித்தனா். அங்கு இருவருக்கும் தீவிர சிகிச்சை அளிக்கப்பட்டு வருகிறது.

தகவலறிந்த கடலூா் புதுநகா் போலீஸாா் அரசு மருத்துவமனைக்கு விரைந்து சென்று அந்த இளைஞரிடம் விசாரணை நடத்தியதில், நெல்லிக்குப்பம் சரவணபுரம் பகுதியைச் சோ்ந்த செல்வம் மகன் தினேஷ் ராஜா (32) எனத் தெரியவந்தது. இதுகுறித்து போலீஸாா் வழக்குப் பதிந்து விசாரணை நடத்தி வருகின்றனா்.