உ.பி முதல்வர் யோகி ஆதித்யநாத்துக்கு கொலை மிரட்டல்... இளம்பெண் கைது.. என்ன நடந்தது?

சமீப காலமாக கொலை மிரட்டல் மற்றும் விமானங்களில் வெடிகுண்டு இருப்பதாக மிரட்டுவது போன்ற சம்பவங்கள் அதிகரித்துள்ளது. சமீப காலத்தில் விமானங்களுக்கு 100-க்கும் மேற்பட்ட வெடிகுண்டு மிரட்டல் வந்திருக்கிறது.

மும்பையில் நடிகர் சல்மான் கானுக்கு அடிக்கடி கொலை மிரட்டல் வந்து கொண்டிருக்கிறது. தற்போது உத்தரபிரதேச முதல்வர் யோகி ஆதித்யநாத்துக்கு கொலை மிரட்டல் விடுக்கப்பட்டுள்ளது. மும்பை போக்குவரத்து கட்டுப்பாட்டு பிரிவுக்குச் சொந்தமான வாட்ஸ் ஆப் ஹெல்ப்லைன் நம்பரில் மர்ம நம்பரில் இருந்து இக்கொலை மிரட்டல் வந்தது. அதில் யோகி ஆதித்யநாத் அடுத்த 10 நாள்களுக்குள் முதல்வர் பதவியில் இருந்து விலகவில்லையெனில் மகாராஷ்டிரா முன்னாள் அமைச்சர் பாபா சித்திக் போன்று படுகொலை செய்யப்படுவார் என்று அதில் குறிப்பிடப்பட்டு இருந்தது.

இக்கொலை மிரட்டலை தொடர்ந்து இது குறித்து போலீஸார் விசாரணை நடத்தினர். தீவிரவாத தடுப்பு படையும் இது குறித்து விசாரித்தது. மிரட்டல் வந்த போன் யாருக்குறியது என்று விசாரித்த போது மும்பை, தானே அருகில் உள்ள உல்லாஸ்நகர் என்ற இடத்தில் வசிக்கும் பாத்திமா கான்(24) என்ற பெண்ணுக்கு சொந்தமானது என்று தெரிய வந்தது.

அவரிடம் விசாரித்த போது அவரது போனில் இருந்துதான் கொலை மிரட்டல் விடுக்கப்பட்டு இருந்தது. இதையடுத்து அப்பெண்ணை போலீஸார் கைது செய்தனர். அவர் தகவல் தொழில் நுட்பத்தில் பி.எஸ்.சி படித்துள்ளார். அவர் சற்று மனநிலை பாதிக்கப்பட்டவர் என்று விசாரணையில் தெரிய வந்துள்ளது. ஆனாலும் போலீஸார் அவரை கைது செய்துள்ளனர்.

கைது செய்யப்பட்ட பெண்ணின் தந்தை மர வியாபாரம் செய்து வருகிறார். யோகி ஆதித்யநாத் மகாராஷ்டிரா சட்டமன்ற தேர்தலில் பிரசாரம் செய்ய வரும் நேரத்தில் இக்கொலை மிரட்டல் விடுக்கப்பட்டுள்ளது.

சமீபத்தில் ஜாம்ஷெட்பூரை சேர்ந்த காய்கறி வியாபாரி மற்றும் நொய்டாவை சேர்ந்த டாட்டூ கலைஞர் ஆகியோர் சல்மான் கானுக்கு கொலை மிரட்டல் விடுத்திருந்தனர். அவர்கள் இரண்டு பேரையும் மும்பை போலீஸார் கைது செய்து அழைத்து வந்தனர்.

இதில் ஒரு கொலை மிரட்டலில் பாபா சித்திக் மகன் சீசன் சித்திக்கிற்கும் கொலை மிரட்டல் விடுக்கப்பட்டு இருந்தது. மும்பையில் பாபா சித்திக் கடந்த மாதம் 12ம் தேதி குஜராத் சிறையில் அடைக்கப்பட்டுள்ள லாரன்ஸ் பிஷ்னோய் கூட்டாளிகளால் சுட்டுக்கொலை செய்யப்பட்டார் என்பது குறிப்பிடத்தக்கது.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்... https://tinyurl.com/2b963ppb

வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்...https://tinyurl.com/2b963ppb