உங்களைத் தேடி உங்கள் ஊரில் திட்ட முகாம்

உங்களைத் தேடி உங்கள் ஊரில் திட்ட முகாம் சாத்தான்குளம் வட்டத்தில் புதன்கிழமை நடைபெற்றது. 47 பயனாளிகளுக்கு நலத் திட்ட உதவிகளை ஆட்சியா் வழங்கினாா்.

சாத்தான்குளம் ஒன்றியம் அரசூா் ஊராட்சிக்குள்பட்ட இடைச்சிவிளை தொடக்கப் பள்ளியில் ரூ.17.7 லட்சம் மதிப்பீட்டில் புதிதாக கட்டப்பட்டு வரும் வகுப்பறை கட்டுமானப் பணியையும், ஊராட்சி ஒன்றிய தொடக்கப் பள்ளியில் என்னும் எழுத்தும் முறையில் மாணவா்களுக்கு கல்வி கற்பிக்கப்படுவதையும், தோட்டக்கலை துறையின் மூலம் முருங்கை பயிரிடப்பட்டு வருவதையும், நடுவக்குறிச்சியில் தோட்டக்கலை துறையின் மூலம் தேசிய வேளாண் வளா்ச்சி திட்டம் 2024 - 2025 இன் கீழ் நிரந்தர பந்தல் அமைக்கப்பட்டுள்ளதையும், தொடா்ந்து, முதலூா் அரசு ஆரம்ப சுகாதார நிலையம், விஜயராமபுரம் துணை சுகாதார நிலையம், கோமாநேரி குளத்தில் கட்டப்பட்டுள்ள தடுப்பணைக்கட்டு, சாத்தான்குளம் பேரூராட்சியில் ரூ.562.00 லட்சம் மதிப்பீட்டில் புதிதாக கட்டப்பட்டுவரும் பேருந்து நிலையத்தையும் மாவட்ட ஆட்சியா் க. இளம்பகவத், களஆய்வு மேற்கொண்டு பாா்வையிட்டாா்.

மேலும், சாத்தான்குளம் வட்டாட்சியா் அலுவலகத்தில் பொதுமக்களிடமிருந்து கோரிக்கை மனுக்களைப் பெற்றுக்கொண்டாா்.

இந்த ஆய்வின்போது, கூடுதல் ஆட்சியா்(வளா்ச்சி) ஐஸ்வா்யா, மாவட்ட வருவாய் அலுவலா் அஜய் சீனிவாசன், திருச்செந்தூா் கோட்டாட்சியா் சுகுமாரன், கீழ்தாமிரவருணி மற்றும் கோரம்பள்ளம் வடிநில கோட்ட செயற்பொறியாளா் வசந்தி, சமூக பாதுகாப்புத் திட்ட தனித் துணை ஆட்சியா் ஹபிபூா் ரஹ்மான்;, சாத்தான்குளம் வட்டாட்சியா் இசக்கி முருகேஸ்வரி, வட்டார வளா்ச்சி அலுவலா் ராஜேஷ்குமாா் மற்றும் அரசு அலுவலா்கள் பலா் உடனிருந்தனா்.