உச்சநீதிமன்றத் தலைமை நீதிபதியிடம் ரூ.55.75 லட்சம்: நிரந்தர வைப்புத் தொகை சொத்து விவரங்கள் வெளியீடு

உச்சநீதிமன்றத் தலைமை நீதிபதி சஞ்சீவ் கன்னாவிடம் நிரந்தர வைப்புத் தொகையாக சுமாா் ரூ.55.75 லட்சம் உள்ளது.

உச்சநீதிமன்றத்தில் தலைமை நீதிபதி உள்பட 33 நீதிபதிகள் உள்ளனா். அவா்களில் 21 நீதிபதிகளின் சொத்து விவரங்கள் உச்சநீதிமன்ற வலைதளத்தில் வெளியிடப்பட்டன.

இதன்படி, உச்சநீதிமன்றத் தலைமை நீதிபதி சஞ்சீவ் கன்னாவுக்கு தெற்கு தில்லியில் தில்லி வளா்ச்சிக் குழுமம் கட்டிய மூன்று படுக்கை அறை கொண்ட அடுக்குமாடி குடியிருப்பு, தில்லியின் காமன்வெல் விளையாட்டுகள் கிராமத்தில் 2,446 சதுர அடி கொண்ட அடுக்குமாடி குடியிருப்பு உள்ளது.

ஹரியாணா மாநிலம் குருகிராமில் நான்கு படுக்கை அறை கொண்ட அடுக்குமாடி குடியிருப்பில் அவருக்கு 56 சதவீதம் பங்குள்ளது. நிரந்தர வைப்புத் தொகையாக சுமாா் ரூ.55.75 லட்சம் உள்ளது. அனைத்து இந்திய குடிமக்களுக்கான வருங்கால வைப்பு நிதியில் (பிபிஎஃப்) ரூ.1.06 கோடியும், அரசு ஊழியா்களுக்கான வருங்கால வைப்பு நிதியில் (ஜிபிஎஃப்) ரூ.1.77 கோடியும் உள்ளது. இதுதவிர 31.25 பவுன் தங்கம், 2 கிலோ வெள்ளி, ஒரு காா் ஆகியவை உள்ளன. இவரின் மனைவியிடம் 87.5 பவுன் தங்கம், 5 கிலோ வெள்ளி, சில வைரங்கள் உள்ளன. வரும் மே 13-ஆம் தேதி சஞ்சீவ் கன்னா ஓய்வுபெற உள்ளாா்.

புதிய தலைமை நீதிபதி பி..ஆா்.கவாய்...: உச்சநீதிமன்றத்தின் புதிய தலைமை நீதிபதியாக பி.ஆா்.கவாய் மே 14-ஆம் தேதி பதவியேற்க உள்ளாா். இவருக்கு மகாராஷ்டிர மாநிலம் அமராவதியில் வீடு, விளைநிலம், நாகபுரியில் விளைநிலம், மகாராஷ்டிர மாநிலம் பாந்த்ரா மற்றும் புது தில்லியின் டிஃபென்ஸ் காலனியில் அடுக்குமாடி குடியிருப்புகள் சொந்தமாக உள்ளன. அத்துடன் பிபிஎஃப்பில் ரூ.6.59 லட்சம், ஜிபிஎஃப்பில் ரூ.35.86 லட்சம், ரூ.61,320 ரொக்கம், வங்கிக் கணக்கில் ரூ.19.63 லட்சம் உள்ளன. இவரின் மனைவியிடம் ரூ.29.70 லட்சம் மதிப்பிலான தங்கம் உள்ளது.

அடுத்த தலைமை நீதிபதி சூா்ய காந்த்...: பி.ஆா்.கவாயை தொடா்ந்து உச்சநீதிமன்றத்தின் அடுத்த தலைமை நீதிபதியாக நிகழாண்டு நவ.24-ஆம் தேதி சூா்ய காந்த் பதவியேற்க உள்ளாா்.

இவருக்கு ஹரியாணா தலைநகா் சண்டீகா், பஞ்ச்குலா, குருகிராம், ஹிசாா் மற்றும் புது தில்லியில் வீடு, விளைநிலம், மனை ஆகியவை உள்ளன. மேலும் ரூ.4.11 கோடிக்கு நிரந்தர வைப்புத்தொகை, 12.5 பவுன் தங்கம், 3 விலைமதிப்புமிக்க கைக்கடிகாரங்கள் உள்ளன.