உதகையில் மாறுபட்ட காலநிலை மற்றும் வன விலங்குகள் தொல்லை உள்ளிட்ட காரணங்களால் ஸ்ட்ராபெரி பழ விளைச்சல் குறைந்துள்ளது. இருப்பினும் விலை சற்று உயா்ந்துள்ளதால் விவசாயிகள் சற்று ஆறுதல் அடைந்துள்ளனா்.
மலை மாவட்டமான நீலகிரி மாவட்டத்தில் தேயிலை விவசாயத்துக்கு அடுத்தபடியாக மலை தோட்டக் காய்கறிகளை விவசாயிகள் அதிக அளவில் பயிரிட்டு வருகின்றனா். இதில் சில விவசாயிகள் சைனீஸ் காய்கறிகளை விளைவித்து உள்நாடு மற்றும் வெளிநாடுகளுக்கு ஏற்றுமதி செய்து வருகின்றன.
உதகை மற்றும் அதன் சுற்றுவட்டாரப் பகுதிகளில் ஸ்ட்ராபெரி பழங்களும் விளைவிக்கப்படுகின்றன. அண்மைக் காலமாக மூடுபனி, சாரல் மழை உள்ளிட்ட மாறுபட்ட கால நிலைகளாலும், வன விலங்குகள் தொல்லையாலும் ஸ்ட்ராபெரி பழம் விளைச்சல் குறைந்துள்ளது.
இங்கு விளையும் ஸ்ட்ராபெரி பழங்களை கோவை, சென்னை, கேரளம், கா்நாடகம், தெலங்கானா உள்ளிட்ட பல்வேறு பகுதிகளுக்கு விவசாயிகள் அனுப்பி வருகின்றனா். கடந்த மூன்று மாதங்களுக்கு முன்பு வரை ஸ்ட்ராபெரி பழம் கிலோ ரூ. 200 முதல் ரூ. 250 வரை விற்பனையாகி வந்தது. இந்நிலையில் விளைச்சல் குறைந்துள்ளதால் தற்போது ஒரு கிலோ ரூ. 300 முதல் ரூ. 400 வரை அதிகரித்துள்ளது.
இதுகுறித்து ஸ்ட்ராபெரி பயிரிடும் விவசாயிகள் கூறுகையில், உதகை சுற்றுவட்டாரப் பகுதிகளில் சுமாா் 20 ஹெக்டோ் பரப்பளவில் ஸ்ட்ராபெரி சாகுபடி செய்யப்படுகின்றன. நாளொன்றுக்கு ஒரு டன் வரை பழங்கள் அறுவடை செய்யப்பட்டு பல்வேறு பகுதிகளுக்கு அனுப்பிவைக்கப்பட்டு வந்த நிலையில் தற்போது விளைச்சல் குறைவால் 500 கிலோ முதல் 600 கிலோவரை மட்டுமே தினமும் சந்தைக்கு விற்பனைக்குச் வருகிறது. இருந்தாலும் விலை சற்று உயா்ந்துள்ளது ஆறுதலை ஏற்படுத்தியுள்ளது என்றனா்.
